ಹೊಸದಿಲ್ಲಿ: ಪದವಿಯನ್ನೇ ಪೂರ್ಣಗೊಳಿಸದ ನೇತ್ರ ವೈದ್ಯನೊಬ್ಬ ಈವರೆಗೆ 44 ಶಸ್ತ್ರಚಿಕಿತ್ಸೆ ನಡೆಸಿರುವ ಆಘಾತಕಾರಿ ಘಟನೆ ಹಿಸಾರ್ ಆರೋಗ್ಯ ಇಲಾಖೆಯಲ್ಲಿ ನಡೆದಿದೆ.
ಆತನ ಪದವಿ ಅಪೂರ್ಣ ಎಂಬ ಕಾರಣ ನೀಡಿ ಆತನನ್ನು ರಾಷ್ಟ್ರೀಯ ಅಂಧತ್ವ ನಿಯಂತ್ರಣ ಕಾರ್ಯಕ್ರಮದ ಉಪನಿರ್ದೇಶಕರು ಇದೀಗ ನಿಷೇಧ ಹೇರಿದ್ದಾರೆ. ಆದರೆ, ಅಷ್ಟರಲ್ಲಾಗಲೇ ಆ ವೈದ್ಯ 44 ಶಸ್ತ್ರಚಿಕಿತ್ಸೆ ನಡೆಸಿದ್ದ ಎಂಬ ಕುತೂಹಲಕರ ಸಂಗತಿ ಇದೀಗ ಬಯಲಾಗಿದೆ.
ಹಿಸಾರ್ ಆಸ್ಪತ್ರೆಯಲ್ಲಿ ಮೂರು ನೇತ್ರ ಚಿಕಿತ್ಸಕ ಹುದ್ದೆಗಳಿದ್ದು, ಮೂರು ವೈದ್ಯರು ರಾಜೀನಾಮೆ ನೀಡಿ ಖಾಸಗಿ ಆಸ್ಪತ್ರೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಆಗ ಪದವಿ ವ್ಯಾಸಂಗ ಮಾಡುತ್ತಿದ್ದ ಡಾ. ವಿಜಯ್ ಎಂಬುವವರನ್ನು ನೇತ್ರ ವೈದ್ಯರಾಗಿ ನೇಮಿಸಲಾಯಿತು.
ಹಂಸಿ ಆಸ್ಪತ್ರೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಡಾ.ಜ್ಯೋತಿ ಹಿಸಾರ್ ಆಸ್ಪತ್ರೆಯ ನೇತ್ರ ಚಿಕಿತ್ಸೆ ವಿಭಾಗದ ಮುಖ್ಯಸ್ಥರಾಗಿದ್ದರು. ಅವರ ನೇತೃತ್ವದಲ್ಲಿವಿಜಯ್ ಕಣ್ಣಿನ ಶಸ್ತ್ರಚಿಕಿತ್ಸೆ ನಡೆಸಲು ಆರಂಭಿಸಿದರು. ಜ್ಯೋತಿ 4 ತಿಂಗಳಲ್ಲಿ 27 ಆಪರೇಷನ್ ನಡೆಸಿದ್ದರೆ, ಡಾ. ವಿಜಯ್ 44 ಆಪರೇಷನ್ ಮಾಡಿದ್ದರು ಎನ್ನಲಾಗಿದೆ.
ಈ ನಡುವೆ ಡಾ. ವಿಜಯ್ ಅವರ ಪದವಿ ಪೂರ್ಣಗೊಳ್ಳದ ವಿಷಯ ಬಹಿರಂಗಗೊಂಡಿದ್ದು, ಅವರು ಇನ್ನು ಮುಂದೆ ಶಸ್ತ್ರಚಿಕಿತ್ಸೆ ನಡೆಸದಂತೆ ರಾಷ್ಟ್ರೀಯ ಅಂಧತ್ವ ನಿಯಂತ್ರಣ ಕಾರ್ಯಕ್ರಮದ ಉಪನಿರ್ದೇಶಕರು ಆದೇಶ ಹೊರಡಿಸಿದ್ದಾರೆ.