ಹೊಸದಿಲ್ಲಿ: ಇಂಡಿಯನ್ ಜರ್ನಲ್ ಆಫ್ ಮೆಡಿಕಲ್ ಎಥಿಕ್ಸ್ನ ಸಂಪಾದಕಿ ಸಿಲ್ವಿಯಾ ಕಾರ್ಪಗಮ್ ಹಾಲು ಮತ್ತು ಪನೀರ್ ಸಸ್ಯಹಾರಿ ಆಹಾರಗಳು ಎಂಬುದನ್ನು ಪ್ರಶ್ನಿಸಿರುವುದು ಇದೀಗ ವಿವಾದಕ್ಕೆ ಕಾರಣವಾಗಿದೆ.
ಡಾ. ಸಿಲ್ವಿಯಾ ಅವರು ‘ಹಾಲು ಮತ್ತು ಪನೀರ್ ಸಸ್ಯಹಾರಿ ಅಲ್ಲ. ಅವು ಪ್ರಾಣಿ ಮೂಲದ ಆಹಾರಗಳು. ಕೋಳಿ, ಮೀನು, ಗೋಮಾಂಸ ಮತ್ತು ಇವೆಲ್ಲವೂ ಒಂದೇ ರೀತಿಯಲ್ಲಿ ಇವೆ’ ಎಂದು ತಮ್ಮ ಎಕ್ಸ್ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.
ಡಾ. ಸುನೀತಾ ಸಾಯಮ್ಮಗರ್ ಎಂಬುವವರು ಮಾಡಿರುವ “ವೆಜ್ ಥಾಲಿ” ಎಂಬ ಪೋಸ್ಟ್ಗೆ ಪ್ರತಿಕ್ರಿಯೆಯ ರೂಪದಲ್ಲಿ ಡಾ. ಸಿಲ್ವಿಯಾ ಮೇಲಿನ ಕಮೆಂಟ್ ಪಾಸ್ ಮಾಡಿದ್ದಾರೆ. ಇದೀಗ ಟ್ವೀಟ್ ವಿವಾದ ಸೃಷ್ಟಿಸಿದ್ದು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆಯನು ಹುಟ್ಟುಹಾಕಿದೆ.
ಡಾ. ಸುನೀತಾ, ” ಪೋಟೋ ಹಂಚಿಕೊAಡು ಇದು ಪ್ರೋಟಿನ್, ಉತ್ತಮ ಕೊಬ್ಬು ಮತ್ತು ಫೈಬರ್‌ನಿಂದ ಕೂಡಿರುವ ಸಮೃದ್ಧವಾದ ಸಸ್ಯಹಾರಿ ಊಟ’ ಎಂದು ಪೋಸ್ಟ್ ಮಾಡಿದ್ದರು. ಇದಕ್ಕೆ ವ್ಯಕ್ತವಾದ ಪ್ರತಿಕಿಯೆ ಈಗ ವಿರೋಧಕ್ಕೆ ಕಾರಣವಾಗಿದೆ.
ಹಾಲು ಮತ್ತು ಪನೀರ್ ಅನ್ನು ಪ್ರಾಣಿಗಳನ್ನು ಕೊಲ್ಲದೆ ಪಡೆಯಲಾಗುತ್ತದೆ. ಹೀಗಾಗಿ, ಅದನ್ನು ಮಾಂಸಾಹಾರ ಎಂದು ಕರೆಯಲು ಸಾಧ್ಯವಿಲ್ಲ ಎಂದು ಕೆಲ ನೆಟ್ಟಿಗರು ವಾದಿಸಿದ್ದರೆ, ಡಾ. ಸಿಲ್ವಿಯಾ, ಹಾಗಾದರೆ, ಮೊಟ್ಟೆಗಳು ಕೂಡ ಯಾರನ್ನೂ ಕೊಲ್ಲದೆ ಉತ್ಪತ್ತಿಯಾಗುತ್ತವೆ. ಅದು ಯಾಕೆ ಸಸ್ಯಹಾರಿ ಅಲ್ಲ ಎಂದು ಪ್ರಶ್ನೆ ಮಾಡಿದ್ದಾರೆ. ಇದು ಮತ್ತಷ್ಟು ಕಿಚ್ಚುಹೊತ್ತಿಸಿದೆ.