ಮಂಗಳೂರು: ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳಲ್ಲಿ ಅತಿ ಹೆಚ್ಚು ದೇವಸ್ಥಾನಗಳಿದ್ದು, ಟೆಂಪಲ್ ಟೂರಿಸಂ ವಿಸ್ತರಣೆಗೆ ಚರ್ಚೆ ನಡೆಸಿ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಸಾರಿಗೆ ಮತ್ತು ಮುಜರಾಯಿ ಇಲಾಖೆ ಸಚಿವ ರಾಮಲಿಂಗಾ ರೆಡ್ಡಿ ತಿಳಿಸಿದ್ದಾರೆ.
ಉಡುಪಿ ಜಿಲ್ಲೆಯ ಕಾಪುವಿನಲ್ಲಿ ನೂತನವಾಗಿ ನಿರ್ಮಾಣವಾಗಿರುವ ಶ್ರೀ ಮಾರಿಗುಡಿ ದೇವಸ್ಥಾನಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ಮಾತನಾಡಿದ ಅವರು, ಬಿಎಂಟಿಸಿ ಮತ್ತು ಕೆಎಸ್ ಆರ್ ಟಿಸಿ ಕಡೆಯಿಂದ ಬೆಂಗಳೂರು ಭಾಗದಲ್ಲಿ ದೇವಸ್ಥಾನಗಳ ವೀಕ್ಷಣೆಗೆ ವಿಶೇಷ ಬಸ್ ಸೌಲಭ್ಯ ಮಾಡಲಾಗಿದೆ. ಮೊದಲಿಗೆ ವಾರಾಂತ್ಯದ ಪ್ರವಾಸ ಆರಂಭಿಸಿದ್ದು, ಇದೀಗ ಪ್ರವಾಸಿಗರ ಉತ್ಸಾಹ ಕಂಡು ಅದನ್ನು ಪ್ರತಿದಿನ ಆಯೋಜಿಸಲಾಗುತ್ತಿದೆ. ಅದೇ ಮಾದರಿಯಲ್ಲಿ ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳಲ್ಲಿ ವಿಸ್ತರಣೆ ಮಾಡಲಾಗುತ್ತದೆ ಎಂದರು.
ಈ ಸಂಬಂಧ ಪ್ರವಾಸದ ಸಚಿವರಾದ ಎಚ್.ಕೆ.ಪಾಟೀಲರ ಜತೆಗೂ ಚರ್ಚೆ ನಡೆಸುತ್ತೇನೆ. ಜಿಲ್ಲಾಧಿಕಾರಿಗಳು ಈ ಬಗ್ಗೆ ಮುತುವರ್ಜಿವಹಿಸಿ ದೇವಸ್ಥಾನಗಳ ಪಟ್ಟಿ ಮಾಡಿ ಕೊಟ್ಟರೆ, KSRTC ಅಧಿಕಾರಿಗಳ ಜತೆಗೆ ಚರ್ಚಿಸಿ, ಒಂದು ಅಥವಾ ಎರಡು ದಿನಗಳ ಟೂರ್ ಪ್ಯಾಕೇಜ್ ಆರಂಭಿಸಲು ಕ್ರಮ ಕೈಗೊಳ್ಳುತ್ತೇವೆ ಎಂದು ತಿಳಿಸಿದರು.
ದೇವಸ್ಥಾನಕ್ಕೆ ಹೆಚ್ಚುವರಿ ಅನುದಾನ ಬೇಡಿಕೆ ಬಗ್ಗೆ ಪ್ರತಿಕ್ರಿಯೆ ನೀಡಿದ ಅವರು, ಡಿಸಿಎಂ ಶಿವಕುಮಾರ್ ಅವರು ಮಹಾನ್ ದೈವಭಕ್ತರು. ಅವರು ಭರವಸೆ ನೀಡಿದ್ದಾರೆ ಎಂದ ಮೇಲೆ ಕ್ರಮ ತೆಗೆದುಕೊಳ್ಳುತ್ತಾರೆ. ಮುಜರಾಯಿ ಇಲಾಖೆಗೆ ಯಾವುದೇ ಮನವಿ ಬಂದಿಲ್ಲ. ಮನವಿ ಬಂದರೆ ಪರಿಶೀಲಿಸಿ ಕ್ರಮ ತೆಗೆದುಕೊಳ್ಳುತ್ತೇವೆ ಎಂದು ತಿಳಿಸಿದರು.
ಈ ಸಂದರ್ಭದಲ್ಲಿ ದೇವಸ್ಥಾನದ ಆವರಣ ವೀಕ್ಷಣೆ ನಡೆಸಿದ ಅವರು, ದಕ್ಷಿಣ ಭಾರತದಲ್ಲೇ ಕೆಂಪು ಬಣ್ಣದ ಗ್ರಾನೈಟ್ ಬಳಸಿ ನಿರ್ಮಾಣ ಮಾಡಿರುವ ಮೊದಲ ದೇವಾಲಯ ಇದು. ಈ ದೇವಾಲಯ ರಸ್ತೆ ಅಗಲೀಕರಣದ ನಂತರ ಮರು ನಿರ್ಮಾಣ ಮಾಡಲು ಹಲವಾರು ಜನರ ಸಹಕಾರವಿದೆ. ಸ್ಥಳೀಯ ನಾಯಕರು ಮತ್ತು ಭಕ್ತಾಧಿಗಳ ಸಹಕಾರದಿಂದ ಒಂದು ಉತ್ತಮ ದೇವಾಲಯ ನಿರ್ಮಾಣವಾಗಿದೆ ಎಂದರು.