ಬೆಂಗಳೂರು: ”ರಾಷ್ಟ್ರಧ್ವಜಕ್ಕೇ ಎಂದೂ ಗೌರವ ಕೊಟ್ಟಿಲ್ಲ. ಜನಗಣಮನ ಬ್ರಿಟಿಷರಿಗೆ ಬರೆದಿದ್ದು ಅನ್ನೋದು ಸೃಷ್ಟಿ ಅಷ್ಟೆ”. ಅವರು ವಾಟ್ಸಾಪ್ ಯೂನಿರ್ಸಿಟಿಯಲ್ಲಿ ಬರುವುದೇ ನಮ್ಮ ಇತಿಹಾಸ ಎಂದುಕೊಂಡಿದ್ದಾರೆ ಎಂದು ಸಚಿವ ಪ್ರಿಯಾಂಕ್ ಖರ್ಗೆ ವಾಗ್ದಾಳಿ ನಡೆಸಿದರು.
ಜನಗಣಮನ ರಾಷ್ಟ್ರಗೀತೆ ಆಗಬಾರದಿತ್ತು ಎಂಬ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಹೇಳಿಕೆಗೆ, ಪ್ರತಿಕ್ರಿಯೆ ನೀಡಿದ ಅವರು, ”ಆರ್ಎಸ್ಎಸ್ನವರಿಗೆ ಅವರದ್ದೇ ಆದ ಇತಿಹಾಸ ಗೊತ್ತಿಲ್ಲ. ರಾಷ್ಟ್ರಧ್ವಜಕ್ಕೆ ಎಂದೂ ಗೌರವ ಕೊಟ್ಟಿಲ್ಲ. ಇದು ಬ್ರಿಟಿಷರಿಗೆ ಬರೆದಿದ್ದು ಅನ್ನೋದು ಸೃಷ್ಟಿ ಅಷ್ಟೆ. ವಾಟ್ಸ್ಆ್ಯಪ್ನಲ್ಲಿ ಬರುವುದನ್ನು ನೋಡುತ್ತಾರೆ. ಅವರ ಶಾಖೆಗಳಲ್ಲಿ ಸುಳ್ಳಿನ ಕಾರ್ಖಾನೆ ನಡೆಸಿದ್ದಾರೆ” ಎಂದು ಟೀಕಿಸಿದರು.
”ಆಗ ಒಂದೇ ಮಾತರಂನಿಂದ ಜನ ಪ್ರೇರಿತರಾಗಿದ್ದು ನಿಜ. ಯುವಕರು ಸ್ವಾತಂತ್ರ ಹೋರಾಟಕ್ಕೆ ಧುಮುಕಿದರು. ನಂತರ ರಾಷ್ಟ್ರಗೀತೆ ಯಾವುದು ಅಂತ ತೀರ್ಮಾನ ಮಾಡಿದ್ದಾರೆ. ಇದೊಂದು ಸಂವಿಧಾನಿಕ ಚರ್ಚೆಯಾಗಲಿ. ಜನರಿಗೆ ಜನಗಣಮನ ಹಾಗೂ ಒಂದೇ ಮಾತರಂ ಬಗ್ಗೆ ಗೌರವ ಇದೆ. ಆದರೆ ಆರ್ಎಸ್ಎಸ್ ಅವರಿಗೆ ಇಲ್ಲ ಅಷ್ಟೆ. ಮನುಸ್ಮೃತಿ ತಂದವರು ಇವರು. ಅವರು ಮೊದಲು ಅವರ ಇತಿಹಾಸ ಓದಲಿ” ಎಂದು ಕಿಡಿಕಾರಿದರು.