ಬೆಂಗಳೂರು: ಇತ್ತೀಚೆಗಷ್ಟೇ ಬಿಡುಗಡೆಯಾಗಿದ್ದ ಗೋಪಿಲೋಲ ಚಿತ್ರದ ಸೆಲೆಬ್ರಿಟಿ ಶೋ ಚಾಮರಾಜಪೇಟೆ ಕಲಾವಿದರ ಸಂಘದಲ್ಲಿ ನಡೆಯಿತು.
ಚಿತ್ರಪ್ರದರ್ಶನಕ್ಕೆ ನಟ ದೊಡ್ಡಣ್ಣ ಸೇರಿದಂತೆ ಹಿರಿಯ ಕಲಾವಿದರು ಭಾಗವಹಿಸಿದ್ದರು. ಚಿತ್ರ ವೀಕ್ಷಣೆ ಮಾಡಿದ ಕಿರುತೆರೆ ಮತ್ತು ಹಿರಿತೆರೆಯ ಕಲಾವಿದರು ಚಿತ್ರದ ಮೇಕಿಂಗ್, ನಾಯಕ ಮತ್ತು ನಾಯಕ ನಟಿಯ ನಟನೆಯ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದರು.
ಬಹಳ ಕಷ್ಟಪಟ್ಟು ಸಿನಿಮಾ ಮಾಡಿದ್ದೇವೆ. ಒಂದು ವಿಭಿನ್ನವಾದ ಕತೆಯನ್ನು ಅಚ್ಚುಕಟ್ಟಾಗಿ ತೆರೆಯ ಮೇಲೆ ತಂದಿದ್ದು, ಚಿತ್ರ ವೀಕ್ಷಣೆ ಮಾಡಿದ ಹಿರಿಯ ಕಲಾವಿದರಿಂದ ಸಿಕ್ಕಿದ ಮೆಚ್ಚುಗೆಯ ಮಾತುಗಳು ನಮ್ಮನ್ನು ಉತ್ಸುಕರನ್ನಾಗಿ ಮಾಡಿವೆ ಎಂದು ಚಿತ್ರದ ನಿರ್ದೇಶಕ ರವೀಂದ್ರ ತಿಳಿಸಿದರು.
ನಾಯಕ ನಟ ಮಂಜುನಾಥ್ ಅರಸ್ ಮಾತನಾಡಿ, ಇದೊಂದು ವಿಭಿನ್ನವಾದ ಪ್ರೇಮಕತೆ, ಎಲ್ಲಿಯೂ ಕಾಣಿಸದ ಒಂದು ರೋಚಕ ಎಳೆಯನ್ನಿಟ್ಟುಕೊಂಡು ಸಿನಿಮಾ ಮಾಡಿದ್ದೇವೆ. ಚಿತ್ರ ಜನರ ಮನಗೆದ್ದಿದೆ. ಹಿರಿಯ ಕಲಾವಿದರು ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. ಇದು ನಮಗೆ ಸ್ಫೂರ್ತಿ ತುಂಬಿದೆ ಎಂದರು.
ಹಿರಿಯ ನಟ ದೊಡ್ಡಣ್ಣ ಮಾತನಾಡಿ, ನಾಯಕ ನಟಿ ನಿಮಷಾ ಕೆ.ಚಂದ್ರ ಹಾಗೂ ನಾಯಕ ಮಂಜುನಾಥ್ ಅರಸ್ ನಟನೆಯ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದರು. ಸನತ್ ಕುಮಾರ್ ನಿರ್ಮಾಣದ ಚಿತ್ರಕ್ಕೆ ರವೀಂದ್ರ ನಿರ್ದೇಶನವಿದೆ.
ತಾರಾಗಣದಲ್ಲಿ ಮಂಜುನಾಥ್ ಅರಸ್, ನಿಮಿಷಾ ಕೆ.ಚಂದ್ರ, ಎಸ್. ನಾರಾಯಣ್, ಜೋಸೈಮನ್, ಕೃಷ್ಣೇಗೌಡ, ಕೆಂಪೇಗೌಡ ಸೇರಿದಂತೆ ದೊಡ್ಡ ತಾರಾಬಳಗವೇ ಇದೆ.