‘ವಾಟ್ಸಾಪ್ ಗ್ರೂಪ್’ ಸಹಾಯದಿಂದ ಮನೆಯಲ್ಲಿ ಹೆರಿಗೆ ಮಾಡಿಕೊಂಡ ದಂಪತಿ

ಬೆಂಗಳೂರು: ವಾಟ್ಸಾಪ್ ಗ್ರೂಪ್ ಸಹಾಯದಿಂದ ದಂಪತಿಗಳು ಮನೆಯಲ್ಲಿಯೇ ಹೆರಿಗೆ ಮಾಡಿಕೊಂಡಿದ್ದು, ಈ ಸಂಬಂಧ ತನಿಖೆ ನಡೆಸಲು ಆರೋಗ್ಯ ಇಲಾಖೆ ಮುಂದಾಗಿದೆ.

ಕುಂದ್ರತ್ತೂರು ಅಮೀಪದ ನಂದ್ರಂಬಾಕಂನಲ್ಲಿ ವಾಸವಿದ್ದ ದಂಪತಿಗಳು ತಮ್ಮ ಮೂರನೇ ಮಗುವಿನ ಹೆರಿಗೆಯನ್ನು ವಾಟ್ಸಾಪ್ ಗ್ರೂಪ್ ಸಹಾಯದಿಂದ ಮಾಡಿಕೊಂಡಿದ್ದಾರೆ. ಇದು ವೈದ್ಯರ ಕಳವಳಕ್ಕೆ ಕಾರಣವಾಗಿದ್ದು, ಪೊಲೀಸರು ದಂಪತಿಗಳಿಗೆ ನೊಟೀಸ್ ನೀಡಿದ್ದಾರೆ.

1000 ಸದಸ್ಯರಿರುವ ಹೋಮ್ ಬರ್ತ್ ಎಕ್ಸ್ಪೀರಿಯನ್ಸ್ ಎಂಬ ವಾಟ್ಸಾಪ್ ಗ್ರೂಪ್ ಸಹಾಯದಿಂದ ಹೆರಿಗೆ ಮಾಡಿಕೊಂಡಿದ್ದಾರೆ. ಈ ಗ್ರೂಪ್ ನಲ್ಲಿ ಫೊಟೋ, ವಿಡಿಯೋ ಮತ್ತು ಹೆರಿಗೆಗೆ ಬೇಕಾದ ನೈಸರ್ಗಿಕ ಸಲಹೆಗಳನ್ನು ಹಂಚಿಕೊಳ್ಳಲಾಗುತ್ತದೆ.

ಈ ಗ್ರೂಪ್ ಮೂಲಕ ಮನೋಹರನ್ ಮತ್ತು ಸುಕನ್ಯಾ ದಂಪತಿಗಳು ತಮ್ಮ ಮಗುವಿಗೆ ಮನೆಯಲ್ಲಿಯೇ ಯಾವುದೇ ಚಿಕಿತ್ಸೆಯಿಲ್ಲದೆ ಹೆರಿಗೆ ಮಾಡಿಸುವ ತೀರ್ಮಾನಕ್ಕೆ ಬಂದಿದ್ದು, ಗುಂಪಿನ ಸಹಾಯದಿಂದ ಹೆರಿಗೆ ಮಾಡಿಕೊಂಡಿದ್ದಾರೆ. ಮನೋಹರನ್ ಜನನ ಪ್ರಕ್ರಿಯೆಯಲ್ಲಿ ಮಡದಿಗೆ ಸಹಾಯ ಮಾಡಿದ್ದಾನೆ ಎನ್ನಲಾಗಿದೆ.

ಹೆರಿಗೆ ನಂತರ ಫೋಟೋ ಗಳನ್ನು ಸಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದ ದಂಪತಿ, ಈ ಬಗ್ಗೆ ಬರೆದುಕೊಂಡಿದ್ದರು. ಸ್ವಯಂ ಪ್ರೇರಿತ ದೂರು ದಾಖಲಿಸಿಕೊಂಡಿದ್ದ ವೈದ್ಯಾಧಿಕಾರಿಗಳು ತನಿಖೆ ನಡೆಸಿದಾಗ ವಾಟ್ಸಾಪ್ ಗ್ರೂಪ್ ನ ಬಗ್ಗೆ ಗೊತ್ತಾಗಿದೆ. ಹೀಗಾಗಿ, ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಲಾಗುತ್ತಿದೆ.

ಘಟನೆಗೆ ಸಂಬಂಧಿಸಿದಂತೆ ತಜ್ಞ ವೈದ್ಯರು, ವೈದ್ಯರು ಮತ್ತು ತರಬೇತಿ ಪಡೆದ ಸಿಬ್ಬಂದಿಯಿಲ್ಲದೆ ಹೆರಿಗೆ ಮಾಡಿಸುವುದು ಅಪಾಯಕಾರಿ. ಇಂತಹ ನಡೆಯನ್ನು ಅನುಸರಿಸುವುದು ಕಾನೂನುಬಾಹಿರ. ಜತೆಗೆ, ತಾಯಿ ಮತ್ತು ಮಗುವಿಗೆ ಅನೇಕ ಸೋಂಕು ತರುವ ಜತೆಗೆ ಪ್ರಾಣಕ್ಕೆ ಅಪಾಯ ತಂದೊಡ್ಡುವ ಸಾಧ್ಯತೆ ಇರುತ್ತದೆ. ಹೀಗಾಗಿ, ಸೂಕ್ತ ಕ್ರಮಕ್ಕೆ ಸಲಹೆ ನೀಡಲಾಗಿದೆ ಎಂದು ಹೇಳಿದ್ದಾರೆ.