ʻಬಿಗ್ ಬಾಸ್ ಕನ್ನಡ 12ʼನ ಭಾನುವಾರದ (ಡಿ.28) ವೀಕೆಂಡ್ ಎಪಿಸೋಡ್ನಲ್ಲಿ ನಿರೀಕ್ಷಿಸದ ತಿರುವೊಂದು ಎದುರಾಯಿತು. ಈ ವಾರದ ಎಲಿಮಿನೇಷನ್ ಪ್ರಕ್ರಿಯೆಯಲ್ಲಿ ಮಾಳು ನಿಪನಾಳ ಅವರು ಬಿಗ್ ಬಾಸ್ ಮನೆಯಿಂದ ಹೊರಬರಬೇಕಾಯಿತು. ಇದೇ ವೇಳೆ ಸ್ಪಂದನಾ ಸೋಮಣ್ಣ ಅವರು ಸುರಕ್ಷಿತವಾಗಿ ಮನೆಯಲ್ಲಿ ಉಳಿಯುವ ಮೂಲಕ ಮುಂದಿನ ಹಂತಕ್ಕೆ ಅರ್ಹರಾದರು.
ಫಿನಾಲೆ ಹತ್ತಿರವಾಗುತ್ತಿರುವ ಹಿನ್ನೆಲೆಯಲ್ಲಿ ಈ ವಾರ ಡಬಲ್ ಎಲಿಮಿನೇಷನ್ ಘೋಷಿಸಲಾಗಿತ್ತು. ಅಶ್ವಿನಿ ಗೌಡ, ರಕ್ಷಿತಾ ಶೆಟ್ಟಿ, ರಘು, ಗಿಲ್ಲಿ, ಧ್ರುವಂತ್, ಸ್ಪಂದನಾ ಸೋಮಣ್ಣ, ಮಾಳು ನಿಪನಾಳ, ಧನುಷ್, ಸೂರಜ್ ಮತ್ತು ರಾಶಿಕಾ ಈ ವಾರ ನಾಮಿನೇಷನ್ ಪಟ್ಟಿಯಲ್ಲಿದ್ದರು. ಶನಿವಾರದ ಎಪಿಸೋಡ್ನಲ್ಲಿ ಸೂರಜ್ ಸಿಂಗ್ ಈಗಾಗಲೇ ಔಟ್ ಆಗಿದ್ದರೆ, ಭಾನುವಾರ ಮಾಳು ಅವರ ಬಿಗ್ ಬಾಸ್ ಪಯಣ ಅಂತ್ಯವಾಯಿತು.
ಈ ಬಾರಿ ನಿರೂಪಕ ಕಿಚ್ಚ ಸುದೀಪ್ ಗೈರುಹಾಜರಿಯಲ್ಲೇ ಎಲಿಮಿನೇಷನ್ ಪ್ರಕ್ರಿಯೆ ನಡೆಯಿತು. ಮನೆಯಲ್ಲಿ ವಿಶೇಷ ಅತಿಥಿಗಳ ಆಗಮನದೊಂದಿಗೆ ಸ್ಪರ್ಧಿಗಳಿಗೆ ಹಲವು ಚಟುವಟಿಕೆಗಳನ್ನು ನೀಡಲಾಯಿತು. ಭಾನುವಾರದ ಎಪಿಸೋಡ್ನಲ್ಲಿ ನಿರೂಪಕಿ ಅನುಪಮಾ ಗೌಡ ಬಿಗ್ ಬಾಸ್ ಮನೆಗೆ ಪ್ರವೇಶಿಸಿ ಸ್ಪರ್ಧಿಗಳ ಜೊತೆ ಸಮಯ ಕಳೆಯುತ್ತಾ, ಒಂದೊಬ್ಬರನ್ನಾಗಿ ಸೇಫ್ ಮಾಡುತ್ತಾ ಬಂದರು. ಕೊನೆಗೆ ಧ್ರುವಂತ್ ಮತ್ತು ರಕ್ಷಿತಾ ಶೆಟ್ಟಿ ಸುರಕ್ಷಿತರು ಎಂಬ ಘೋಷಣೆ ನಡೆಯಿತು.
ಅಂತಿಮ ಹಂತದಲ್ಲಿ ಸ್ಪಂದನಾ ಸೋಮಣ್ಣ ಮತ್ತು ಮಾಳು ನಿಪನಾಳ ಇಬ್ಬರ ನಡುವೆ ನೇರ ಪೈಪೋಟಿ ನಡೆಯಿತು. ಸ್ಪರ್ಧಿಗಳ ಅಭಿಪ್ರಾಯಗಳು ವಿಭಿನ್ನವಾಗಿದ್ದವು. ಇಬ್ಬರನ್ನೂ ಪ್ರತ್ಯೇಕ ಕಾರಿನಲ್ಲಿ ಕೂರಿಸಿ, ವಾಪಸ್ಸು ಬರುವ ಕಾರಿನಲ್ಲಿರುವ ಸ್ಪರ್ಧಿ ಸೇಫ್ ಆಗುತ್ತಾರೆ ಎಂಬ ಟ್ವಿಸ್ಟ್ ನೀಡಲಾಯಿತು. ಬಹುತೇಕರು ಮಾಳು ವಾಪಸ್ ಬರ್ತಾರೆ ಎಂದು ಅಂದಾಜಿಸಿದ್ದರು. ಆದರೆ ಫಲಿತಾಂಶ ತಿರುಗಿಬಿದ್ದಿದ್ದು, ಸ್ಪಂದನಾ ಸೇಫ್ ಆಗಿ ಮಾಳು ಎಲಿಮಿನೇಟ್ ಆಗಿದರು. ಈ ನಿರ್ಧಾರ ಹಲವರಿಗೆ ಅಚ್ಚರಿಯನ್ನುಂಟುಮಾಡಿತು.
ಉತ್ತರ ಕರ್ನಾಟಕದ ಪ್ರತಿಭೆಯಾಗಿರುವ ಮಾಳು ನಿಪನಾಳ ಅವರು ಬಿಗ್ ಬಾಸ್ ಮನೆಯಲ್ಲಿ ಆರಂಭದಿಂದಲೇ ಗಮನ ಸೆಳೆದಿದ್ದರು. ಅವರ ಆಟದ ಶೈಲಿ ಕುರಿತು ಸಾಕಷ್ಟು ಕುತೂಹಲ ಇದ್ದರೂ, ಎಲ್ಲರ ನಿರೀಕ್ಷೆ ತಲುಪಲಿಲ್ಲ ಎಂಬ ಅಭಿಪ್ರಾಯವೂ ಕೇಳಿಬಂತು. ಆದರೂ ಮಿನಿ ಫಿನಾಲೆಯಲ್ಲಿ ಸ್ಥಾನ ಪಡೆದು, ಕ್ಯಾಪ್ಟನ್ ಆಗುವ ಮೂಲಕ ಅವರು ವೀಕ್ಷಕರ ಮನಗೆದ್ದಿದ್ದರು. ಆದರೆ ಗ್ರ್ಯಾಂಡ್ ಫಿನಾಲೆಗೆ ಮುನ್ನವೇ ಅವರ ಪಯಣ ಮುಕ್ತಾಯಗೊಂಡಿದೆ.
ಗಮನಾರ್ಹ ಸಂಗತಿ ಏನೆಂದರೆ, ಮನೆಗೆ ಪ್ರವೇಶಿಸಿದ ಎರಡನೇ ವಾರದಲ್ಲೇ “ಇಲ್ಲಿ ನನಗೆ ಹೊಂದಿಕೆಯಾಗುತ್ತಿಲ್ಲ” ಎಂದು ಹೊರಹೋಗುವ ಆಸೆ ವ್ಯಕ್ತಪಡಿಸಿದ್ದ ಮಾಳು, ಬಳಿಕ 90ಕ್ಕೂ ಹೆಚ್ಚು ದಿನಗಳನ್ನು ಬಿಗ್ ಬಾಸ್ ಮನೆಯಲ್ಲಿ ಕಳೆದಿದ್ದಾರೆ. ಅಂತಿಮವಾಗಿ ಅವರ ಬಿಗ್ ಬಾಸ್ ಜರ್ನಿ ಇಲ್ಲಿಗೆ ತೆರೆ ಬಿದ್ದಿದೆ.