ಪೊಲೀಸರು ಪವಿತ್ರಾ ಗೌಡಳನ್ನೇ ಪ್ರಕರಣದ ಎ-1 ಆರೋಪಿಯಾಗಿದ್ದು ಯಾಕೆ?
ದರ್ಶನ್ ತನ್ನ ಕೆರಿಯರ್ ಹಾಳಾಯ್ತು ಎಂದು ಪವಿತ್ರಾಗೂ ಥಳಿಸಿದ್ರಾ?
ಬೆಂಗಳೂರು: ರೇಣುಕಾ ಸ್ವಾಮಿ ಕೊಲೆ ಪ್ರಕರಣದಲ್ಲಿ 17 ಜನ ಆರೋಪಿಗಳಿದ್ರೂ, ಪವಿತ್ರಾ ಗೌಡರನ್ನೇ ಎ-1 ಆರೋಪಿಯನ್ನಾಗಿ ಪೊಲೀಸರು ಪ್ರಕರಣ ದಾಖಲಿಸಿರುವುದು ಯಾಕೆ? ಎಂಬ ಅನುಮಾನ ಮೂಡುವುದು ಸಹಜ.
ಸಾಮಾನ್ಯವಾಗಿ ಕೊಲೆ ಮಾಡಿದವರೇ ಮೊದಲ ಆರೋಪಿಯಾಗುವುದು ಸಹಜ. ಹಾಗಾದ್ರೆ, ಪವಿತ್ರಾ ಗೌಡ ರೇಣುಕಾ ಸ್ವಾಮಿ ಕೊಲೆ ಮಾಡಿದ್ದಾರೆ ಎಂಬ ಅನುಮಾನವೇನಾದ್ರೂ ಪೊಲೀಸರಿಗೆ ಬಂದಿದ್ಯಾ? ಅಥವಾ ಅಂತಹ ಯಾವುದಾದರೂ ಸಾಕ್ಷಿಗಳು ಸಿಕ್ಕಿವೆಯಾ ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿದೆ. ಅಷ್ಟಕ್ಕೂ ಪವಿತ್ರಾ ಗೌಡ ಎ-1 ಆರೋಪಿಯಾಗಲು ಅಸಲೀ ಕಾರಣ ಏನ್ ಗೊತ್ತಾ?
ಪವಿತ್ರಾ ಗೌಡ ತಮ್ಮ ಇನ್ಸ್ಟಾಗ್ರಾಮ್ ಖಾತೆ ತಾವೇ ಹ್ಯಾಂಡಲ್ ಮಾಡ್ತಿದ್ದರು. ಆ ಖಾತೆಗೆ ದರ್ಶನ್ ಅಭಿಮಾನಿಗನೇಕರು ಮೆಸೇಜ್ ಮಾಡ್ತಿದ್ದರು. ಪವಿತ್ರಾ ಗೌಡ ನನ್ನ ಮತ್ತು ದರ್ಶನ್ ಸಂಬಂಧಕ್ಕೆ 10 ವರ್ಷದ ಸವಿನೆನಪು ಎಂದು ಪೋಸ್ಟ್ ಹಾಕಿದ ಮೇಲಂತೂ, ಅವರಿಗೆ ಬರುತ್ತಿದ್ದ ಮೆಸೇಜ್‌ಗಳ ಸಂಖ್ಯೆ ಹೆಚ್ಚಾಗತೊಡಗಿತು.
ಇಂತಹ ಸಂದರ್ಭದಲ್ಲೆ ಚಿತ್ರದುರ್ಗದ ರೇಣುಕಾ ಸ್ವಾಮಿ, ಪವಿತ್ರಾಗೆ ಮೆಸೇಜ್ ಮಾಡಿ, ನಮ್ಮ ಬಾಸ್ ಸಂಸಾರ ಹಾಳ್ ಮಾಡ್ತಿದ್ದೀಯಾ? ನಮ್ಮ ಅತ್ತಿಗೆ ಜತೆ ನಮ್ ಬಾಸ್ ಇರೋದಕ್ಕೆ ನೀನೆ ಅಡ್ಡಿಯಾಗಿದ್ದೀಯಾ ಎಂದು ಮೆಸೇಜ್ ಮಾಡಿದ್ದ. ಇದು ಪವಿತ್ರಾಳನ್ನು ಕೆಣಕಿತ್ತು. ಇದನ್ನು ದರ್ಶನ್ ಮುಂದೆ ಹೇಳಿಕೊಂಡು, ಆತನಿಗೆ ಬುದ್ದಿ ಕಲಿಸುವಂತೆ ಹೇಳಿದ್ದಳು. ಆದರೆ, ದರ್ಶನ್ ಇದೆಲ್ಲ ಮಾಮೂಲಿ ಬಿಟ್ಟಾಕು ಚಿನ್ನ ಎಂದು ಸೈಲೆಂಟ್ ಆಗಿದ್ದರು.
ದರ್ಶನ್ ಅವರ ಈ ನಡೆ ಪವಿತ್ರಾಗೆ ಬಲು ಬೇಸರ ತರಿಸಿತ್ತು. ಹೀಗಾಗಿ, ತನ್ನ ಸಹಾಯಕ ಪವನ್‌ಗೆ ತನ್ನ ಅಕೌಂಡ್ ಹ್ಯಾಂಡಲ್ ಕೊಟ್ಟು, ಆತನನ್ನು ಹೇಗಾದರೂ ಮಾಡಿ ಬಲೆಗೆ ಕೆಡವುವಂತೆ ಹೇಳಿದ್ದಳು. ಹೀಗಾಗಿ, ಪವನ್ ರೇಣುಕಾ ಸ್ವಾಮಿಗೆ ಪವಿತ್ರಾ ಗೌಡರಂತೆಯೇ ಮೆಸೇಜ್ ಮಾಡಿ, ಆತನನ್ನು ಕೆಣಕಿದ್ದ. ಆತನಿಂದ ಅಶ್ಲೀಲ ಮೆಸೇಜ್‌ಗಳು ಬರುವಂತೆ ಆತನನ್ನು ಉದ್ರೇಕಗೊಳಿಸಿದ್ದ ಎನ್ನಲಾಗಿದೆ.
20 ದಿನ ದರ್ಶನ್ ಜತೆ ಮಾತುಬಿಟ್ಟಿದ್ದ ಪವಿತ್ರಾ: ರೇಣುಕಾ ಸ್ವಾಮಿ ಬಗ್ಗೆ ಹೇಳಿದರೂ ಏನೂ ಕ್ರಮ ತೆಗೆದುಕೊಳ್ಳದ ದರ್ಶನ್ ಅವರ ಜತೆ ಪವಿತ್ರಾ 20 ದಿನ ಮಾತುಬಿಟ್ಟಿದ್ದರು ಎನ್ನಲಾಗಿದೆ. ಅಷ್ಟರಲ್ಲಿ ರೇಣುಕಾ ಸ್ವಾಮಿ ಅಶ್ಲೀಲ ಮೆಸೇಜ್ ಕೂಡ ಬಂದಿತ್ತು. ಇದನ್ನಿಟ್ಟುಕೊಂಡು ದರ್ಶನ್‌ರನ್ನು ಕೆಣಕಿದ್ದರು. ನಿನ್ನ ಹೆಂಡತಿ ಪರ ಮಾತನ್ನಾಡಿದ್ದಾನೆ ಎಂಬ ಕಾರಣಕ್ಕೆ ನೀನು ಆತನಿಗೆ ಏನೂ ಮಾಡ್ತಿಲ್ಲ, ನಾನು ಎಷ್ಟೇ ಆಗ್ಲಿ ಇಟ್ಟುಕೊಂಡವಳು ಎಂಬರ್ಥದಲ್ಲಿ ಮಾತನ್ನಾಡಿದ್ದರು. ಇದರಿಂದ ರೊಚ್ಚಿಗೆದ್ದ ದರ್ಶನ್, ಪವನ್‌ಗೆ “ಅದ್ಯಾವನೂ ನೋಡಿ ಎತ್ತಾಕಂಡ್ ಬಾರೋ” ಎಂದಿದ್ದರು ಎನ್ನಲಾಗಿದೆ.
ಮೊದಲು ಹೊಡೆದಿದ್ದೆ ಪವಿತ್ರಾ ಗೌಡ !: ಇನ್ನು ರೇಣುಕಾ ಸ್ವಾಮಿ, ಶೆಡ್ ಗೆ ಕರೆತಂದ ‘ಡಿ’ ಗ್ಯಾಂಗ್ ಮೊದಲು ದರ್ಶನ್‌ಗೆ ಕರೆ ಮಾಡಿತ್ತು. ದರ್ಶನ್ ಪವಿತ್ರಾಗೆ ಕರೆ ಮಾಡಿ, ಬಾ ನೋಡು ಅವನನ್ನ ಎತ್ತಾಕಂಡ್ ಬಂದಿದ್ದೀನಿ ಎಂದು ಶೆಡ್‌ಗೆ ಕರೆಸಿದ್ದರು. ಆಗ ಮೊದಲಿಗೆ ಆತನ ಮೇಲೆ ಹಲ್ಲೆ ಮಾಡಿದ್ದೆ ಪವಿತ್ರಾ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಚಪ್ಪಲಿಯಿಂದ ಹೊಡೆದ ಪವಿತ್ರಾ, ಕಾಲಿನಿಂದ ರೇಣುಕಾ ಸ್ವಾಮಿ ಮರ್ಮಾಂಗಕ್ಕೆ ಕಾಲಿನಿಂದ ಒದ್ದರು ಎನ್ನಲಾಗಿದೆ.
ಪವಿತ್ರಾಗೂ ಹೊಡೆದಿದ್ದರಾ ದರ್ಶನ್ !: ಪವಿತ್ರಾ ಮುಂದೆ ಪರಾಕ್ರಮ ಮೆರೆದಿದ್ದ ದರ್ಶನ್ ಮತ್ತು ಗ್ಯಾಂಗ್‌ನ ಹೊಡೆತದಿಂದ ರೇಣುಕಾ ಸ್ವಾಮಿ ಸಾವನ್ನಪ್ಪಿದ್ದು, ಗೊತ್ತಾಗುತ್ತಿದ್ದಂತೆ ದರ್ಶನ್ ಪವಿತ್ರಾ ಮೇಲೆ ಹಲ್ಲೆ ಮಾಡಿದ್ದರು ಎನ್ನಲಾಗಿದೆ. ನಿನ್ ಮಾತು ಕೇಳಿ ಆತನನ್ನು ಇಲ್ಲಿಗೆ ಕರೆಸಿದೆ. ಈಗ ಸಾವನ್ನಪ್ಪಿದ್ದಾನೆ. ಇದರಿಂದ ನನ್ನ ಕೆರಿಯರ್ ಹಾಳಾಗುತ್ತೆ ಎಂದು ಸಿಟ್ಟಾಗಿ ಗಲಾಟೆ ಮಾಡಿದ್ದರು ಎನ್ನಲಾಗಿದೆ. ನಂತರ ಬೇಸರಿಸಿಕೊಂಡು ಮೈಸೂರಿಗೆ ತೆರಳಿ ಅಲ್ಲಿದ್ದುಕೊಂಡೇ, ಪ್ರಕರಣದಿಂದ ಪಾರಾಗುವ ಪ್ರಯತ್ನ ಮಾಡಿದ್ದರು. ಹೊಡೆತದಿಂದ ಬಿದ್ದ ಪೆಟ್ಟಿಗೆ ಪವಿತ್ರಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು ಎನ್ನಲಾಗಿದೆ. ದರ್ಶನ್ ಬಂಧನವಾದ ಸುದ್ದಿ ತಿಳಿದ ನಂತರ ಪವಿತ್ರಾ ಗೌಡ ಪೊಲೀಸರ ಮುಂದೆ ಬಂದು ಶರಣಾಗಿದ್ದಾರೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.