ರಾಜಧಾನಿ ಬೆಂಗಳೂರಲ್ಲಿ ಖಾಸಗಿ ಕಾಲೇಜುಗಳದ್ದೇ ಕಾರುಬಾರು !

ಬೆಂಗಳೂರು: ದೇಶದ ಶೈಕ್ಷಣಿಕ ವ್ಯವಸ್ಥೆಯಲ್ಲಿ ಮುಂಚೂಣಿಯಲ್ಲಿರುವ ರಾಜ್ಯ ರಾಜಧಾನಿ ಬೆಂಗಳೂರು ಇಡೀ ದೇಶದಲ್ಲಿಯೇ ಅತಿ ಹೆಚ್ಚು ಖಾಸಗಿ ಕಾಲೇಜುಗಳನ್ನು ಹೊಂದಿರುವ ನಗರವಾಗಿದೆ.

ರಾಜಧಾನಿಯ ಕಾಲೇಜುಗಳ ಪೈಕಿ ನೂರರಲ್ಲಿ ಶೇ. 84 ರಷ್ಟು ಕಾಲೇಜುಗಳು ಖಾಸಗಿ ಕಾಲೇಜುಗಳಾಗಿವೆ.  ಇದು ಉಳಿದ ಮೆಟ್ರೋ ನಗರಗಳಿಗೆ ಹೋಲಿಕೆ ಮಾಡಿದ್ದಲ್ಲಿ ಅತಿಹೆಚ್ಚು ಖಾಸಗಿ ಕಾಲೇಜುಗಳು ರಾಜಧಾನಿಯಲ್ಲಿವೆ. ಹೈದರಾಬಾದ್, ಪುಣೆ, ಗ್ರೇಟರ್ ಮುಂಬಯಿ, ಚೆನ್ನೈ, ದೆಹಲಿ ನಂತರದ ಸ್ಥಾನದಲ್ಲಿವೆ. ಕೊಲ್ಕತ್ತಾ ಅತೀ ಕಡಿಮೆ ಖಾಸಗಿ ಕಾಲೇಜುಗಳನ್ನು ಹೊಂದಿರುವ ನಗರವಾಗಿದೆ.

ಹೈದರಾಬಾದ್ ಶೇ. 81, ಪುಣೆಯಲ್ಲಿ ಶೇ. 73, ಗ್ರೇಟರ್ ಮುಂಬಯಿಯಲ್ಲಿ ಶೇ. 70, ಚೆನ್ನೈಯಲ್ಲಿ ಶೇ.68 ರಷ್ಟು ಖಾಸಗಿ ಕಾಲೇಜುಗಳಿವೆ. ದೆಹಲಿಯಲ್ಲಿ ಶೇ. 67 ರಷ್ಟು ಖಾಸಗಿ ಕಾಲೇಜುಗಳಿವೆ. ಅತೀ ಕಡಿಮೆ ಪ್ರಮಾಣದ ಖಾಸಗಿ ಕಾಲೇಜುಗಳನ್ನು ಹೊಂದಿರುವ ಕೊಲ್ಕತ್ತಾದಲ್ಲಿ ಶೇ. 47 ರಷ್ಟು ಮಾತ್ರವೇ, ಕಾಲೇಜುಗಳಿವೆ ಎಂಬ ಅಂಕಿ- ಅಂಶಗಳು ವರದಿಯಲ್ಲಿ ಬಹಿರಂಗವಾಗಿವೆ.

ಬೆಂಗಳೂರು ನಗರದಲ್ಲಿರುವ ವ್ಯವಸ್ಥೆ, ಸರಕಾರದ ಸೌಲಭ್ಯಗಳು, ಖಾಸಗಿ ಕಾಲೇಜುಗಳ ಸ್ಥಾಪನೆಗೆ ಇರುವ ಸರಳ ನಿಯಮಗಳಿಂದಾಗಿ ಖಾಸಗಿ ಕಾಲೇಜುಗಳ ಸಂಖ್ಯೆ ನಗರದಲ್ಲಿ ಹೆಚ್ಚಾಗಿವೆ.