ರಾಜ್ಯದಲ್ಲಿನ ಕಟ್ಟಡ ಹಾಗೂ ಇತರೆ ನಿರ್ಮಾಣ ಕಾರ್ಮಿಕರ ಆರ್ಥಿಕ ಭದ್ರತೆಗಾಗಿ ಕರ್ನಾಟಕ ಕಟ್ಟಡ ಮತ್ತು ಇತರೆ ನಿರ್ಮಾಣ ಕಾರ್ಮಿಕರ ಕಲ್ಯಾಣ ಮಂಡಳಿ ಹಲವು ಕಲ್ಯಾಣಕಾರಿ ಯೋಜನೆಗಳನ್ನು ಜಾರಿಗೆ ತಂದಿದೆ. ವೃದ್ಧಾಪ್ಯದಲ್ಲಿ ಆಸರೆಯಾಗುವ ಪಿಂಚಣಿ, ಅಂಗವಿಕಲರಿಗೆ ನೆರವು, ಮರಣಾನಂತರ ಕುಟುಂಬ ಪೋಷಣೆಗೆ ಪಿಂಚಣಿ ಸೇರಿದಂತೆ ಶಿಕ್ಷಣ, ಹೆರಿಗೆ, ಮದುವೆ ಮತ್ತು ಉಪಕರಣಗಳ ಸಹಾಯವೂ ಈ ಯೋಜನೆಗಳಲ್ಲಿ ಸೇರಿವೆ.
ಪಿಂಚಣಿ ಯೋಜನೆಯ ಉದ್ದೇಶವೇನು?: ಕಟ್ಟಡ ಕಾರ್ಮಿಕರು ಕೆಲಸ ಮಾಡುವ ಅವಧಿಯಲ್ಲಿ ಮಾತ್ರವಲ್ಲದೆ, ನಿವೃತ್ತಿಯ ನಂತರವೂ ಗೌರವಯುತ ಜೀವನ ನಡೆಸಲು ನೆರವಾಗುವುದು ಈ ಯೋಜನೆಯ ಮುಖ್ಯ ಉದ್ದೇಶ. ಮಂಡಳಿಯಲ್ಲಿ ನೋಂದಾಯಿತ ಕಾರ್ಮಿಕರು 60 ವರ್ಷ ತುಂಬಿದ ಬಳಿಕ ಮಾಸಿಕ ಪಿಂಚಣಿಗೆ ಅರ್ಹರಾಗುತ್ತಾರೆ. ಕಾರ್ಮಿಕರ ಅಕಾಲಿಕ ಮರಣದ ಸಂದರ್ಭದಲ್ಲೂ ಅವರ ಕುಟುಂಬಕ್ಕೆ ಆರ್ಥಿಕ ಸಹಾಯ ಒದಗಿಸಲಾಗುತ್ತದೆ.
ಪಿಂಚಣಿ ಸೌಲಭ್ಯಗಳ ವಿವರ
ವೃದ್ಧಾಪ್ಯ ಪಿಂಚಣಿ:
60 ವರ್ಷ ಪೂರೈಸಿದ ನೋಂದಾಯಿತ ಕಟ್ಟಡ ಕಾರ್ಮಿಕರಿಗೆ ಪ್ರತಿ ತಿಂಗಳು ₹3,000 ಪಿಂಚಣಿ ನೀಡಲಾಗುತ್ತದೆ.
ಅಂಗವಿಕಲ ಪಿಂಚಣಿ:
ಅಪಘಾತ ಅಥವಾ ಗಂಭೀರ ಕಾಯಿಲೆಯಿಂದ ಶಾಶ್ವತ ಅಥವಾ ಭಾಗಶಃ ಅಂಗವಿಕಲರಾದ ಕಾರ್ಮಿಕರಿಗೆ ಮಾಸಿಕ ₹2,000 ಪಿಂಚಣಿ ಲಭ್ಯ. ಜೊತೆಗೆ ಅಂಗವಿಕಲತೆಯ ಪ್ರಮಾಣವನ್ನು ಆಧರಿಸಿ ಗರಿಷ್ಠ ₹2 ಲಕ್ಷವರೆಗೆ ಒಮ್ಮೆ ಮಾತ್ರದ ಸಹಾಯಧನ ನೀಡಲಾಗುತ್ತದೆ.
ಕುಟುಂಬ ಪಿಂಚಣಿ:
ಕಾರ್ಮಿಕರ ಮರಣದ ಬಳಿಕ ಅವರ ಪತಿ ಅಥವಾ ಪತ್ನಿಗೆ ಮಾಸಿಕ ₹1,500 ಕುಟುಂಬ ಪಿಂಚಣಿ ನೀಡಲಾಗುತ್ತದೆ.
ಅಂತ್ಯಕ್ರಿಯೆ ನೆರವು:
ಅಂತ್ಯಕ್ರಿಯೆ ವೆಚ್ಚಕ್ಕಾಗಿ ₹4,000 ಮತ್ತು ಅನುಗ್ರಹ ರಾಶಿಯಾಗಿ ಗರಿಷ್ಠ ₹71,000 ವರೆಗೆ ಸಹಾಯಧನ ಸಿಗುತ್ತದೆ.
ನೋಂದಾಯಿಸದ ಕಾರ್ಮಿಕರ ಕುಟುಂಬಕ್ಕೆ:
ನೋಂದಣಿ ಇಲ್ಲದ ಕಾರ್ಮಿಕರು ಮೃತಪಟ್ಟರೆ ಅವರ ಅವಲಂಬಿತರಿಗೆ ಒಮ್ಮೆ ಮಾತ್ರದ ನೆರವಿನ ರೂಪದಲ್ಲಿ ಗರಿಷ್ಠ ₹50,000 ನೀಡುವ ವ್ಯವಸ್ಥೆಯೂ ಇದೆ.
ಅರ್ಹತಾ ಮಾನದಂಡಗಳು
ಅರ್ಜಿದಾರರು ಮಂಡಳಿಯಲ್ಲಿ ನೋಂದಾಯಿತ ಕಟ್ಟಡ ಕಾರ್ಮಿಕರಾಗಿರಬೇಕು
ಕನಿಷ್ಠ 60 ವರ್ಷ ವಯಸ್ಸು ಪೂರ್ಣಗೊಂಡಿರಬೇಕು
ಪಿಂಚಣಿಗೆ ಅರ್ಜಿ ಸಲ್ಲಿಸುವ ಮೊದಲು ಕನಿಷ್ಠ 3 ವರ್ಷಗಳ ಕಾಲ ನಿರಂತರ ನೋಂದಣಿ ಇರಬೇಕು
ವರ್ಷಕ್ಕೆ ಕನಿಷ್ಠ 90 ದಿನ ನಿರ್ಮಾಣ ಕಾರ್ಯದಲ್ಲಿ ತೊಡಗಿಸಿಕೊಂಡಿರಬೇಕು
ಇತರೆ ಪ್ರಮುಖ ಕಲ್ಯಾಣ ಸೌಲಭ್ಯಗಳು
ಶೈಕ್ಷಣಿಕ ಸಹಾಯಧನ (ಕಲಿಕೆ ಭಾಗ್ಯ):
ಕಾರ್ಮಿಕರ ಮಕ್ಕಳ ವಿದ್ಯಾಭ್ಯಾಸಕ್ಕೆ ವರ್ಷಕ್ಕೆ ₹2,000 ರಿಂದ ₹30,000 ವರೆಗೆ ನೆರವು.
ಹೆರಿಗೆ ನೆರವು (ತಾಯಿ ಲಕ್ಷ್ಮೀ ಬಾಂಡ್):
ಮಹಿಳಾ ಫಲಾನುಭವಿಗಳಿಗೆ ಮೊದಲ ಎರಡು ಮಕ್ಕಳ ಜನನದ ಸಂದರ್ಭದಲ್ಲಿ ತಲಾ ₹50,000 ಸಹಾಯಧನ.
ಮದುವೆ ಸಹಾಯಧನ:
ಕಾರ್ಮಿಕರ ಸ್ವಂತ ಮದುವೆ ಅಥವಾ ಅವರ ಇಬ್ಬರು ಮಕ್ಕಳ ವಿವಾಹಕ್ಕೆ ₹50,000 ನೆರವು.
ಉಪಕರಣಗಳ ಸಹಾಯ (ಟೂಲ್ಕಿಟ್):
ವೃತ್ತಿಗೆ ಅಗತ್ಯವಿರುವ ಉಪಕರಣಗಳನ್ನು ಖರೀದಿಸಲು ಗರಿಷ್ಠ ₹20,000 ಧನಸಹಾಯ.
ನೋಂದಣಿ ಪ್ರಕ್ರಿಯೆ
1.karbwwb.karnataka.gov.in ವೆಬ್ಸೈಟ್ಗೆ ಭೇಟಿ ನೀಡಿ
- “Register” ಆಯ್ಕೆಯನ್ನು ಕ್ಲಿಕ್ ಮಾಡಿ
- “Register as New Construction Worker” ಆಯ್ಕೆ ಮಾಡಿ
- ಆಧಾರ್ಗೆ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆಗೆ ಬಂದ OTP ಮೂಲಕ ಪರಿಶೀಲನೆ ಮಾಡಿ
- ಅಗತ್ಯ ಮಾಹಿತಿಯನ್ನು ಭರ್ತಿ ಮಾಡಿ ದಾಖಲೆಗಳನ್ನು ಅಪ್ಲೋಡ್ ಮಾಡಿ ಸಲ್ಲಿಸಿ ನವೀಕರಣ ವಿಧಾನ
ಲಾಗಿನ್ ಆದ ಬಳಿಕ ಡ್ಯಾಶ್ಬೋರ್ಡ್ನಲ್ಲಿರುವ “Renewal” ಆಯ್ಕೆ ಮಾಡಿ
ಅಗತ್ಯ ವಿವರಗಳು ಮತ್ತು ದಾಖಲೆಗಳನ್ನು ಸಲ್ಲಿಸಿ ನವೀಕರಣ ಪೂರ್ಣಗೊಳಿಸಿ
ಮುಖ್ಯ ಸೂಚನೆಗಳು
ನೋಂದಣಿಯನ್ನು ಪ್ರತಿ 3 ವರ್ಷಕ್ಕೊಮ್ಮೆ ಕಡ್ಡಾಯವಾಗಿ ನವೀಕರಿಸಬೇಕು
ನಿಗದಿತ ಅವಧಿಯಲ್ಲಿ ನವೀಕರಿಸದಿದ್ದರೆ 1 ವರ್ಷದ ಸವಲತ್ತು ಅವಧಿ ಮಾತ್ರ ಲಭ್ಯ
ಅದಕ್ಕೂ ನಂತರ ನವೀಕರಣ ಮಾಡದಿದ್ದರೆ ನೋಂದಣಿ ರದ್ದುಪಡಿಸಲಾಗುತ್ತದೆ
ಸಹಾಯವಾಣಿ
ಕರ್ನಾಟಕ ಕಟ್ಟಡ ಮತ್ತು ಇತರೆ ನಿರ್ಮಾಣ ಕಾರ್ಮಿಕರ ಕಲ್ಯಾಣ ಮಂಡಳಿ
ಕಾರ್ಮಿಕ ಭವನ, ಡೈರಿ ಸರ್ಕಲ್, ಬನ್ನೇರುಘಟ್ಟ ರಸ್ತೆ, ಬೆಂಗಳೂರು – 29
ದೂರವಾಣಿ: 080-29753078