ರಾಯಚೂರು ಜಿಲ್ಲೆಯ ಸಿಂಧನೂರಿನ ಯುವಕನೊಬ್ಬ ತನ್ನ ಪೋಷಕರ ಜೀವನದ ಕನಸನ್ನು ನನಸಾಗಿಸಿ ಎಲ್ಲರ ಗಮನ ಸೆಳೆದಿದ್ದಾನೆ. ಬೆಂಗಳೂರಿನಿಂದ ಹೆಲಿಕ್ಯಾಪ್ಟರ್ ವ್ಯವಸ್ಥೆ ಮಾಡಿ ತಂದೆ–ತಾಯಿಯನ್ನು ಕರೆತಂದು, ಸಿಂಧನೂರು ಹಾಗೂ ಸುತ್ತಮುತ್ತಲಿನ ಪ್ರದೇಶಗಳನ್ನು ಆಕಾಶದಿಂದ ತೋರಿಸಿ, ಅವರು ಕಂಡಿದ್ದ ಆಸೆಗೆ ರೂಪ ಕೊಟ್ಟಿದ್ದಾನೆ.
ಪೋಷಕರ ಮಾತಿಗೆ ಮೌಲ್ಯ: ಸಿಂಧನೂರಿನ ಜನತಾ ಕಾಲೋನಿಯಲ್ಲಿ ವಾಸಿಸುವ ಅಬ್ದುಲ್ ಎಂಬ ಯುವಕ, ಹಿಂದೆ ತಂದೆ–ತಾಯಿ “ಒಮ್ಮೆ ಹೆಲಿಕ್ಯಾಪ್ಟರ್ನಲ್ಲಿ ಪ್ರಯಾಣಿಸಬೇಕು” ಎಂದು ಹೇಳಿದ್ದ ಮಾತನ್ನು ಮನಸ್ಸಿನಲ್ಲಿ ಇಟ್ಟುಕೊಂಡಿದ್ದ. ಕೊಟ್ಟ ಮಾತಿನಂತೆ ಸುಮಾರು 6 ಲಕ್ಷ ರೂಪಾಯಿ ವೆಚ್ಚ ಮಾಡಿ, ಪೋಷಕರೊಂದಿಗೆ ಕುಟುಂಬದವರನ್ನೂ ಸೇರಿಸಿ ಹೆಲಿಕ್ಯಾಪ್ಟರ್ ಸವಾರಿ ಮಾಡಿಸಿದ್ದಾನೆ. ಶನಿವಾರ ಈ ವಿಶೇಷ ಕ್ಷಣವನ್ನು ಕುಟುಂಬ ಸಂಪೂರ್ಣವಾಗಿ ಆನಂದಿಸಿದೆ.
ಊರಿನ ಮೆಚ್ಚುಗೆ ಪಡೆದ ಕಾರ್ಯ: ವಾರ್ಡ್ ನಂಬರ್ 25ರ ನಿವಾಸಿಗಳಾದ ಶರೀಫ್ ಸಾಬ್ ಮತ್ತು ಸಜಾದಿ ಬೇಗ ದಂಪತಿಯ ಮೊದಲ ಮಗ ಅಬ್ದುಲ್, ಬೆಂಗಳೂರಿನಿಂದ ಸಿಂಧನೂರಿಗೆ ಹೆಲಿಕ್ಯಾಪ್ಟರ್ ಮೂಲಕ ಆಗಮಿಸಿ, ಸ್ಥಳೀಯ ಪ್ರಮುಖ ತಾಣಗಳನ್ನು ಪೋಷಕರಿಗೆ ತೋರಿಸಿದ್ದಾನೆ. ಮಗನ ಈ ಪ್ರೀತಿಪೂರ್ಣ ನಡೆಗೆ ಸಿಂಧನೂರಿನ ಜನತೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಸರಳ ಜೀವನ, ದೊಡ್ಡ ಮನಸ್ಸು: ಸಣ್ಣಪುಟ್ಟ ಕೆಲಸಗಳೊಂದಿಗೆ ರಿಯಲ್ ಎಸ್ಟೇಟ್ ಕ್ಷೇತ್ರದಲ್ಲಿ ದುಡಿದು ಬದುಕು ಕಟ್ಟಿಕೊಂಡಿರುವ ಅಬ್ದುಲ್, ತನ್ನ ಶ್ರಮದ ಫಲವನ್ನು ತಂದೆ–ತಾಯಿಯ ಸಂತೋಷಕ್ಕಾಗಿ ಬಳಸಿದ್ದಾನೆ. ಪೋಷಕರ ಕನಸನ್ನು ಈಡೇರಿಸುವ ಮೂಲಕ ಇತರ ಯುವಕರಿಗೂ ಉತ್ತಮ ಮಾದರಿಯಾಗಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ.
“ಇದು ನನ್ನ ಕೃತಜ್ಞತೆಯ ಸಂಕೇತ”: ಈ ಕುರಿತು ಮಾತನಾಡಿದ ಅಬ್ದುಲ್, “ಹೆಲಿಕ್ಯಾಪ್ಟರ್ನಲ್ಲಿ ಸುತ್ತಾಡಬೇಕು ಎಂಬುದು ನನ್ನ ತಂದೆ–ತಾಯಿಯ ಆಸೆ. ಅದನ್ನು ನೆರವೇರಿಸಿದ್ದೇ ನಾನು ಅವರಿಗೆ ನೀಡಿದ ಸಣ್ಣ ಉಡುಗೊರೆ. ಅವರ ಮುಖದಲ್ಲಿ ಕಂಡ ಸಂತೋಷವೇ ನನಗೆ ದೊಡ್ಡ ಸಂಪತ್ತು” ಎಂದು ಹೇಳಿಕೊಂಡಿದ್ದಾರೆ.