ಮುಂಬೈ: ಅಂಧೇರಿಯದ ಐಷಾರಾಮಿ ಕಾಂಪ್ಲೆಸ್ ಆದ ಲೋಖಂಡವಾಲಾ ಕಟ್ಟಡದಲ್ಲಿ 15 ತಿಂಗಳಲ್ಲಿ 3 ಬಾರಿ ಅಗ್ನಿ ದುರಂತ ಸಂಭವಿಸಿದ್ದು ಬುಧವಾರ ಮೂವರು ಬಲಿಯಾಗಿದ್ದಾರೆ.
ಈ ಹಿಂದೆ ಸೆಪ್ಟೆಂಬರ್ 19 ರಂದು ಸ್ಟರ್ಲಿಂಗ್ ಬಂಗಲೆಯ 11 ನೆಯ ಕೊಠಡಿಯಲ್ಲಿ ಅವಘಡ ಸಂಭವಿಸಿತ್ತು. ಕಳೆದ ವರ್ಷ ಜುಲೈ 23 ರಂದು ಬೆಂಕಿ ಕಾಣಿಸಿಕೊಂಡಿತು. ಆದರೆ ಈಗ ಮೂರನೇ ಬಾರಿಗೆ ನೆಬ್ಯೂಲನ್ ಅಪಾರ್ಟ್ಮೆಂಟ್ ನಲ್ಲಿ ಬುಧವಾರ ಬೆಂಕಿ ಕಾಣಿಸಿಕೊಂಡಿದೆ.
ರಿಯಾ ಪ್ಯಾಲೇಸ್ ನ ಕ್ರಾಸ್ ಲೈನ್ ಸಂಖ್ಯೆ 4 ರಲ್ಲಿ ಬೆಳಗ್ಗೆ 8 ಗಂಟೆಗೆ ಬೆಂಕಿ ಕಾಣಿಸಿಕೊಂಡಿದೆ. ಇದರಿಂದಾಗಿ ದೃಷ್ಟಿ ಹೀನತೆಯಿಂದ ಬಳಲುತ್ತಿದ್ದ ಚಂದರ್ ಪ್ರಕಾಶ್ ಸೋನಿ(73), ಅವರ ಪತ್ನಿ ಕಾಂತ(65) ಹಾಗೂ ಮನೆ ಕೆಲಸಗಾರ ರವಿ ಭಾಟಿಯಾ(43) ಸಾವನ್ನಪ್ಪಿದ್ದಾರೆ.
ವಿಷಯ ತಿಳಿದ ತಕ್ಷಣ ಅಗ್ನಿಶಾಮಕ ದಳ ಸ್ಥಳಕ್ಕೆ ಆಗಮಿಸಿದೆ. ಬೆಂಕಿಯನ್ನು ನಂದಿಸುವ ಕೆಲಸ ನಡೆದಿದೆ. ಈ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಅಗ್ನಿಶಾಮಕ ದಳದ ವಿಭಾಗೀಯ ಅಧಿಕಾರಿ ಪಿ. ಡಿ. ಸಂಡಿಕರ್ ಹೇಳಿದ್ದಾರೆ. ರಿಯಾ ಪ್ಯಾಲೇಸ್ ನ ಕಾರ್ಯದರ್ಶಿ ಕ್ರೀಶಾನ್ ಅರೋರಾ ಹಾಗೂ ಅಧ್ಯಕ್ಷ ಡಾ. ರಾಜು ಸಾಹೇತ್ಯ ಸಿಸಿಟಿವಿ ದೃಶ್ಯ ಗಳನ್ನು ಪೊಲೀಸರಿಗೆ ನೀಡಿದ್ದಾರೆ ಎಂದು ತಿಳಿದು ಬಂದಿದೆ.
ಆಸ್ಪತ್ರೆಗೆ ಮೂವರನ್ನು ಸ್ಥಳಾಂತರಿಸಲಾಗಿತ್ತು. ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ ಎಂದು ತಿಳಿದು ಬಂದಿದೆ.