ಬೆಂಗಳೂರು: ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ ಮತ್ತು ಕಾಂಟಿನೆಂಟಲ್ ಇಂಡಿಯಾ ಅಟೋಮೋಟಿವ್‌ ಕಂಪೆನಿ ವತಿಯಿಂದ ದೃಷ್ಟಿ ವಿಶೇಷಚೇತನರಿಗೆ “ಆನ್ ಬೋರ್ಡ್” ತಂತ್ರಜ್ಞಾನ ಉಪಯೋಗಿಸಿ ಸ್ವತಂತ್ರವಾಗಿ ಪ್ರಯಾಣ ಮಾಡುವ ಹೊಸ ಆಯಾಮಕ್ಕೆ ಸಾರಿಗೆ ಮತ್ತು ಮುಜರಾಯಿ ಇಲಾಖೆ ಸಚಿವ ರಾಮಲಿಂಗಾ ರೆಡ್ಡಿ ಚಾಲನೆ ನೀಡಿದರು.
ನಗರ ಬಸ್ ನಿಲ್ದಾಣಗಳಲ್ಲಿ ದೃಷ್ಟಿ ವಿಶೇಷಚೇತನರು ಯಾವ ಬಸ್ ಬರುತ್ತಿದೆ ಎಂಬುದನ್ನು ಅಥವಾ ತಾವು ಇಳಿಯಬೇಕಾದ ಸ್ಥಳ ಯಾವುದು ಎಂಬುದನ್ನು ತಿಳಿದುಕೊಳ್ಳಲು ಇನ್ನೊಬ್ಬರ ನೆರವಿಗೆ ಅವಲಂಬಿತರಾಗಬೇಕಾಗುವುದು ಸಾಮಾನ್ಯ ಸಂಗತಿ. ಈ ಅವಲಂಬನೆಗಳಿಂದಾಗಿ ಅವರಲ್ಲಿ ಆತ್ಮಸ್ಥೈರ್ಯ ಹೀನತೆ, ಮಾನಸಿಕ ಒತ್ತಡ ಉಂಟಾಗುತ್ತಿದೆ. ಇದೇ ಸಮಸ್ಯೆಗೆ ಪರಿಹಾರವಾಗಿ, ದೃಷ್ಟಿಹೀನರು ಸ್ವತಂತ್ರವಾಗಿ ತಮ್ಮ ಪ್ರಯಾಣ ನಿರ್ವಹಿಸಬಹುದಾದ “ಆನ್‌ಬೋರ್ಡ್” ಸಾಧನವನ್ನು ರೂಪಿಸಲಾಗಿದೆ.
ಈ ಸಾಧನದ ಉದ್ದೇಶ, ಅವರ ದೈನಂದಿನ ಪ್ರಯಾಣದಲ್ಲಿ ಆತ್ಮವಿಶ್ವಾಸ ಹೆಚ್ಚಿಸುವುದು.
ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆಯು ತನ್ನ ಬಸ್ಸುಗಳಲ್ಲಿ ಈ ಆಧುನಿಕ ತಂತ್ರಜ್ಞಾನವನ್ನು ಅಳವಡಿಸುತ್ತಿದ್ದು, ದೃಷ್ಟಿಹೀನ ಹಾಗೂ ದೃಷ್ಟಿ ವಿಶೇಷಚೇತನ ಪ್ರಯಾಣಿಕರಿಗೆ ಸುರಕ್ಷಿತ ಮತ್ತು ಸುಲಭ ಪ್ರಯಾಣ ಅನುಭವವನ್ನು ಒದಗಿಸಲು ಮುಂದಾಗಿದೆ.
ಈ ಮಹತ್ವಾಕಾಂಕ್ಷೆ ಯೋಜನೆ ಕಾಂಟಿನೆಂಟಲ್ ಆಟೋಮೊಟಿವ್ ಕಂಪೋನೆಂಟ್ಸ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್, ಐಐಟಿ ದೆಹಲಿ, Raised Lines Foundation (RLF) ಮತ್ತು Enable India ಸಹಯೋಗದಲ್ಲಿ ಕಾರ್ಯರೂಪಕ್ಕೆ ಬಂದಿದೆ.
ಆನ್‌ಬೋರ್ಡ್ ತಂತ್ರಜ್ಞಾನದ ಕರ್ತವ್ಯ ನಿರ್ವಹಣೆ
• ಹ್ಯಾಂಡ್‌ಹೆಲ್ಡ್ ರಿಮೋಟ್ ಸಾಧನ: ಪ್ರಯಾಣಿಕರು ಹಿಡಿದುಕೊಳ್ಳಬಹುದಾದ ಸಾಧನ.
• ಬಸ್‌ನ ಎಡಭಾಗದ ಮುಂದೆ ಅಳವಡಿಸಲಾದ ಸಂಪರ್ಕ ಘಟಕ: ಬಸ್ಸಿನ ಒಳಗೆ ಲಗತ್ತಿಸಲಾಗುವ ಸಾಧನ.
ಬಸ್ ನಿಲ್ದಾಣದ ಹತ್ತಿರ ಬಸ್ಸು ಬಂದಾಗ, ದೃಷ್ಟಿ ವಿಶೇಷಚೇತನ ಪ್ರಯಾಣಿಕನು “Find” ಬಟನ್ ಒತ್ತಿದರೆ, ಬಸ್‌ನಲ್ಲಿ ಅಳವಡಿಸಿರುವ ಸ್ಪೀಕರ್‌ನಿಂದ ಬಸ್ ಮಾರ್ಗ ಸಂಖ್ಯೆ ಘೋಷಣೆಯಾಗುತ್ತದೆ. ಬೇಕಾದ ಬಸ್ ಆಗಿದ್ದರೆ, “Select” ಬಟನ್ ಒತ್ತಿದಾಗ, ಬಸ್ಸಿನಲ್ಲಿ ಅಳವಡಿಸಿರುವ ಘಟಕಕ್ಕೆ ಸಿಗ್ನಲ್ ತೆರಳುತ್ತದೆ. ಚಾಲಕ ಮತ್ತು ನಿರ್ವಾಹಕನಿಗೆ ದೃಷ್ಟಿಹೀನ ಪ್ರಯಾಣಿಕನು ಬಸ್ಸಿಗೆ ಹತ್ತಲು ಬರುತ್ತಿರುವ ಮಾಹಿತಿ ದೊರೆಯುತ್ತದೆ. ಆ ವೇಳೆ ಬಸ್ಸು ಹೆಚ್ಚಿನ ಕಾಲ ನಿಲ್ಲಿಸಲಾಗುತ್ತದೆ. ಇದೇ ತಂತ್ರಜ್ಞಾನ, ಪ್ರಯಾಣಿಕನು ಇಳಿಯಬೇಕಾದ ಸ್ಥಳ ಹತ್ತಿರ ಬಂದಾಗ ಸಹ ಕಾರ್ಯನಿರ್ವಹಿಸುತ್ತದೆ.
ಆನ್‌ಬೋರ್ಡ್ ವ್ಯವಸ್ಥೆಯ ಪ್ರಮುಖ ವೈಶಿಷ್ಟ್ಯಗಳು
• ಆಯ್ಕೆ ಮಾಡಿದ ಬಸ್ಸು 30 ಮೀಟರ್ ವ್ಯಾಪ್ತಿಗೆ ಬಂದಾಗ ಸಾಧನ ಸೂಚನೆ ನೀಡುತ್ತದೆ.
• ಹತ್ತುವ ಮತ್ತು ಇಳಿಯುವ ವೇಳೆಯಲ್ಲಿ ಧ್ವನಿ ಸೂಚನೆ ನೀಡುತ್ತದೆ.
• ಮಳೆ, ಬಿಸಿಲು, ಧೂಳಿನಂತಹ ಪರಿಸ್ಥಿತಿಗಳಲ್ಲೂ ಸಾಧನ ನಿಖರವಾಗಿ ಕಾರ್ಯನಿರ್ವಹಿಸುತ್ತದೆ.
ಪ್ರಾಯೋಗಿಕ ಯೋಜನೆ – ಯಶಸ್ವಿ ಪ್ರಯೋಗ:
ಆನ್‌ಬೋರ್ಡ್ ಸಾಧನವನ್ನು ಪ್ರಾಯೋಗಿಕವಾಗಿ 401K ಮತ್ತು 242B ಮಾರ್ಗದ 25 ಬಸ್ಸುಗಳಲ್ಲಿ ಅಳವಡಿಸಲಾಗಿತ್ತು. ಈ ಮಾರ್ಗಗಳು ದೃಷ್ಟಿಹೀನ ಪ್ರಯಾಣಿಕರು ಹೆಚ್ಚು ಪ್ರಯಾಣಿಸುವ ಮಾರ್ಗಗಳಾಗಿವೆ. ಯೋಜನೆಯಡಿಯಲ್ಲಿ 500 ಪ್ರಯಾಣಿಕರಿಗೆ ತರಬೇತಿ ನೀಡಲಾಗಿದ್ದು, 25 ಮಂದಿ ಪ್ರಯಾಣಿಕರು ನೇರವಾಗಿ ಉಪಕರಣ ಬಳಸಿದ್ದಾರೆ. ಇವರ ಪ್ರತಿಕ್ರಿಯೆ ಬಹುತೇಕ ಧನಾತ್ಮಕವಾಗಿದೆ.
ಮುಂದಿನ ಹಂತ – ಬೃಹತ್ ವಿಸ್ತರಣೆ: ಈ ಯಶಸ್ಸ ಪ್ರೇರಣೆಯಿಂದ, ಸಂಸ್ಥೆ 500 ಬಸ್ಸುಗಳಲ್ಲಿ “ಆನ್‌ಬೋರ್ಡ್” ಸಾಧನ ಅಳವಡಿಸಲು ಅನುಮೋದನೆ ನೀಡಿದೆ. ಮೊದಲ ಹಂತದಲ್ಲಿ 401K ಮತ್ತು 401R ಮಾರ್ಗಗಳಿಗೆ ಆದ್ಯತೆ ನೀಡಲಾಗಿದೆ. ಜೂನ್ 2025ರಲ್ಲಿ ಮುಂದಿನ 100 ಸಾಧನಗಳ ಅಳವಡಿಕೆ ಪ್ರಾರಂಭವಾಗಿದ್ದು, ಆ. 2025ರೊಳಗೆ ಪೂರ್ಣಗೊಳ್ಳಲಿರುವ ಗುರಿಯಾಗಿದೆ.
ತಂತ್ರಜ್ಞಾನ ಅಭಿವೃದ್ಧಿ ಹಾಗೂ ಅನುಸ್ಥಾಪನೆ ವಿವರ
• ಐಐಟಿ ದೆಹಲಿ ಈ ತಂತ್ರಜ್ಞಾನ ಅಭಿವೃದ್ಧಿಪಡಿಸಿದ್ದು, Raised Lines Foundation (RLF)ಮೂಲಕ ಜಾರಿಗೆ ತಂದಿದೆ.
• ಕಾಂಟಿನೆಂಟಲ್ ಆಟೋಮೊಟಿವ್ ಮತ್ತು RLF 500 ಬಸ್ಸುಗಳಿಗೆ ಉಪಕರಣ ಅಳವಡಿಸಲು ಯೋಜನೆ.
• ಸ್ಪೀಕರ್ ಬಸ್‌ನ ಎಡಬದಿ ಲೋವರ್ ಗ್ಲಾಸ್ ಮೇಲೆ ಅಳವಡಿಸಲಾಗಿದ್ದು, ಬಸ್ಸಿನ ವಿದ್ಯುತ್ ವ್ಯವಸ್ಥೆಗೆ ಸಂಪರ್ಕಿಸಲಾಗಿದೆ.
• ಪ್ರಾರಂಭದಲ್ಲಿ ಸಂಯೋಜನೆ ಸಮಸ್ಯೆಗಳಿದ್ದರೂ, ಉಪಕರಣ ನವೀಕರಿಸಿ, ಸರ್ವರ್‌ಗಳ ಸಂಯೋಜನೆ ಪೂರ್ಣಗೊಳಿಸಿ 125 ಬಸ್ಸುಗಳಿಗೆ ಅಳವಡಿಕೆ ನಡೆಯಿತು.
• ದೃಷ್ಟಿಹೀನ ಪ್ರಯಾಣಿಕರ ಹೆಚ್ಚುವರಿ ಸಂಚಾರ ಇರುವ ಮಾರ್ಗಗಳಾದ 401 ಮತ್ತು 410 ಗಳಿಗೆ ಆದ್ಯತೆ ನೀಡಲಾಗಿದೆ.
• ಸಂಸ್ಥೆ 125 ಡೀಸೆಲ್ ಬಸ್ಸುಗಳ ಪಟ್ಟಿ ನೀಡಿ, ತಾಂತ್ರಿಕ ಸಿಬ್ಬಂದಿ ನಿಯೋಜಿಸಿದೆ. ಈ ಉಪಕರಣವನ್ನು ಮಾರ್ಗಗಳಲ್ಲಿ ಓಡುತ್ತಿರುವ ಬಸ್‌ಗಳಲ್ಲಿ ಸ್ಥಾಪಿಸಲಾಗಿದೆ
• 401K ಮತ್ತು 401R ಮಾರ್ಗದ ಬಸ್‌ಗಳು ಯಲಹಂಕದಿಂದ ಕೆಂಗೇರಿವರೆಗೆ, 401M ಮಾರ್ಗದ ಬಸ್ ಯಶವಂತಪುರದಿಂದ ಕೆಂಗೇರಿವರೆಗೆ, 410FA ಬಸ್ ಯಶವಂತಪುರದಿಂದ ಬನಶಂಕರಿ ಟಿಟಿಎಂಸಿ ರವರೆಗೆ ಮತ್ತು 410FG ಬಸ್ ಯಶವಂತಪುರದಿಂದ ನಯಂಡನಹಳ್ಳಿ ಮೆಟ್ರೋ ನಿಲ್ದಾಣವರೆಗೆ ಕಾರ್ಯಾಚರಿಸುತ್ತದೆ.
ಸಮಗ್ರ ಭವಿಷ್ಯದ ಕಡೆಗೆ
ಈ ಯೋಜನೆ ನಗರದಾದ್ಯಂತ ವಿಸ್ತಾರಗೊಂಡಂತೆ, ಬೆಂಮಸಾಸಂಸ್ಥೆ ಮತ್ತು ಕಾಂಟಿನೆಂಟಲ್ ಇತರ ಸಾರಿಗೆ ಸಂಸ್ಥೆಗಳು ಹಾಗೂ ತಂತ್ರಜ್ಞಾನ ಅಭಿವೃದ್ಧಿಪಡಿಸುವವರು ಈ ರೀತಿಯ ಪರಿಹಾರಗಳನ್ನು ಅಳವಡಿಸಬೇಕೆಂಬ ಅಗತ್ಯವನ್ನು ಒತ್ತಿ ಹೇಳಿದ್ದಾರೆ. ಈ ಮಾದರಿಯು ಇತರ ರಾಜ್ಯಗಳಲ್ಲಿ ಅನುಸರಿಸಲು ಆಸಕ್ತಿ ಹುಟ್ಟುಹಾಕಿದ್ದು, ದೇಶದ ಮಟ್ಟದಲ್ಲಿ ಸುಲಭ ಲಭ್ಯತೆಯಾದ ಸಾರಿಗೆಗಾಗಿ ಮಾದರಿಯಾಗಿದೆ.
ಅಧಿಕೃತ ಬಿಡುಗಡೆ ಕಾರ್ಯಕ್ರಮವು ನೇರ ಪ್ರದರ್ಶನ, ಮಾಧ್ಯಮ ಸಂವಾದ ಅವಧಿಗಳು ಮತ್ತು ದೈಹಿಕ ಸಾಮರ್ಥ್ಯ ಲೆಕ್ಕಿಸದೆ ಎಲ್ಲಾ ನಾಗರಿಕರಿಗೆ ಸುಲಭವಾಗಿ ಮತ್ತು ಗೌರವಾನ್ವಿತ ಸಾರಿಗೆಯನ್ನು ಖಚಿತಪಡಿಸಿಕೊಳ್ಳಲು ಸಾರ್ವಜನಿಕ-ಖಾಸಗಿ ಸಹಭಾಗಿತ್ವವನ್ನು ಬಲಪಡಿಸುವ ಕರೆಯೊಂದಿಗೆ ಮುಕ್ತಾಯವಾಯಿತು.