ಬೆಂಗಳೂರು: ಸಾರ್ವಜನಿಕರಿಗೆ ಸುಲಭದಲ್ಲಿ ಇ-ಖಾತೆ ಸೌಲಭ್ಯ ಒದಗಿಸುವ ನಿಟ್ಟಿನಲ್ಲಿ ಈಗಾಗಲೇ ಕ್ರಾಂತಿಯನ್ನೇ ಮಾಡಿರುವ ಬಿಟಿಎಂ ಲೇಔಟ್ ಕ್ಷೇತ್ರದಲ್ಲಿ ಇದೀಗ ಮನೆ ಬಾಗಿಲಿಗೆ ಇ-ಖಾತೆ ಒದಗಿಸುವ ವಿನೂತನ ಪ್ರಯೋಗ ಜಾರಿಗೊಳಿಸಲಾಗುತ್ತಿದೆ.
ಈಗಾಗಲೇ ಕಳೆದ ಒಂದು ತಿಂಗಳಿಂದ ಸಚಿವ ರಾಮಲಿಂಗಾ ರೆಡ್ಡಿ ಅವರ ಕಚೇರಿಯಲ್ಲಿ ಉಚಿತವಾಗಿ ಇ-ಖಾತಾ ಮಾಡಿಕೊಡುವ ಅಭಿಯಾನ ನಡೆಯುತ್ತಿದೆ. ಇಲ್ಲಿ ಸಾವಿರಾರು ನಾಗರಿಕರು ಇ-ಖಾತಾ ಸೌಲಭ್ಯಗಳನ್ನು ಪಡೆದುಕೊಳ್ಳುತ್ತಿದ್ದಾರೆ. ಇದೀಗ ರಾಮಲಿಂಗಾ ರೆಡ್ಡಿ ಅವರ ನೇತೃತ್ವದ ಆರ್‌ಎಲ್‌ಆರ್ ತಂಡದಿಂದ ಮನೆಮನೆಗೆ ಇ-ಖಾತಾ ಸೌಲಭ್ಯ ಒದಗಿಸಲು ಅಭಿಯಾನ ಶುರುವಾಗಲಿದೆ.
ಆಗಸ್ಟ್‌ 30ರವರೆಗೆ ನಡೆಯುವ ಈ ಅಭಿಯಾನದಲ್ಲಿ ಹಿರಿಯ ನಾಗರೀಕರು, ವಿಕಲಚೇತನರು ಹಾಗೂ ಅನಾರೋಗ್ಯದಿಂದ ಬಳಲುತ್ತಿರುವ ಆಸ್ತಿ ಮಾಲೀಕರ ಅನುಕೂಲಕ್ಕಾಗಿ ಅವರ ಮನೆಯ ಬಾಗಿಲಿಗೆ ತೆರಳಿ ಇ-ಖಾತಾ ಮಾಡಿಕೊಡಲಾಹುತ್ತದೆ. ಈ ಸೇವೆಯನ್ನು ಉಚಿತವಾಗಿಯೇ ಒದಗಿಸಲು ತೀರ್ಮಾನಿಸಲಾಗಿದೆ.
ಈ ಅಭಿಯಾನಕ್ಕೆ ಸಂಬಂಧಿಸಿದಂತೆ ಹೆಚ್ಚಿನ ವಿವರಗಳಿಗೆ 9341191411 ಮತ್ತು 9945756078 ಸಂಖ್ಯೆಗೆ ಕರೆ ಮಾಡಬಹುದು. ಆರ್‌ಎಲ್‌ಆರ್ ತಂಡ ಮನೆ ಬಾಗಿಲಿಗೆ ಆಗಮಿಸಿದ ಸಂದರ್ಭದಲ್ಲಿ ಆಸ್ತಿ ಮಾಲೀಕರು ಸೇಲ್ ಡೀಡ್ ಪ್ರತಿ, ಖಾತಾ ಪ್ರತಿ, ಕಟ್ಟಡದ ಫೋಟೋವನ್ನು ಜಿಪಿಎಸ್ ಲೊಕೇಷನ್ ಸಹಿತ ಒದಗಿಸುವುದು, ಇತ್ತೀಚಿನ ವಿದ್ಯುತ್ ಬಿಲ್, ಟ್ಯಾಕ್ಸ್‌ ಪಾವತಿ ರಸೀದಿ, ಆಧಾರ್ ಕಾರ್ಡ್ ಪ್ರತಿ ಹಾಗೂ ಪಾಸ್‌ಪೋರ್ಟ್ ಅಳತೆಯ ಫೋಟೋಗಳನ್ನು ಒದಗಿಸಬೇಕು.
ಸ್ಥಳಕ್ಕಾಗಮಿಸುವ ತಂಡ ಈ ಎಲ್ಲ ದಾಖಲೆಗಳನ್ನು ಪಡೆದು, ಉಚಿತವಾಗಿ ಇ-ಖಾತಾ ದಾಖಲೆಯನ್ನು ಸ್ಥಳದಲ್ಲಿಯೇ ಮಾಡಿಕೊಟ್ಟು, ವಿತರಣೆ ಮಾಡಲಿದೆ.