ಬೆಂಗಳೂರು: ನಗರದಲ್ಲಿನಂದಿನಿ ಬ್ರ್ಯಾಂಡ್ ಹೆಸರಿನಲ್ಲಿ ನಡೆಯುತ್ತಿದ್ದ ನಕಲಿ ತುಪ್ಪ ಮಾರಾಟ ಮಾಡುತ್ತಿದ್ದ ಜಾಲವನ್ನು ಪತ್ತೆಹಚ್ಚಿರುವ, ಸಿಸಿಬಿ ಪೊಲೀಸರು ನಂದಿನಿ ಉತ್ಪನ್ನದ ಅಧಿಕೃತ ಮಾರಾಟಗಾರ ಸೇರಿ ನಾಲ್ವರನ್ನು ಬಂಧಿಸಿದ್ಧಾರೆ.
ಚಾಮರಾಜಪೇಟೆಯ ಮಹೇಂದ್ರ ಮತ್ತು ಈತನ ಪುತ್ರ ದೀಪಕ್ ಹಾಗೂ ತಮಿಳುನಾಡು ಮೂಲದ ಮುನಿರಾಜು ಮತ್ತು ಅಭಿ ಅರಸು ಬಂಧಿತರು. ಆರೋಪಿಗಳಿಂದ 1.26 ಕೋಟಿ ರೂ. ಮೌಲ್ಯದ 8,136 ಲೀಟರ್ ನಕಲಿ ನಂದಿನಿ ಬ್ರ್ಯಾಂಡ್‌ನ ಕಲಬೆರೆಕೆ ತುಪ್ಪ ಮತ್ತು ನಾಲ್ಕು ವಾಹನಗಳು, ಕಲಬೆರೆಕೆ ತುಪ್ಪ ತಯಾರು ಮಾಡಲು ಬಳಸುತ್ತಿದ್ದ ಯಂತ್ರಗಳು, ತೆಂಗು ಮತ್ತು ಪಾಮ್‌ ಆಯಿಲ್‌ ಎಣ್ಣೆಗಳನ್ನು ವಶಕ್ಕೆ ಪಡೆಯಲಾಗಿದೆ.
ನಂದಿನಿ ತುಪ್ಪದ ಬಹುಬೇಡಿಕೆಯನ್ನು ದುರ್ಬಳಕೆ ಮಾಡಿಕೊಂಡ ಆರೋಪಿಗಳು, ತಮಿಳುನಾಡು ರಾಜ್ಯದಲ್ಲಿ ಕಲಬೆರೆಕೆ ತುಪ್ಪವನ್ನು ಸಿದ್ದಪಡಿಸಿ ನಗರದಲ್ಲಿ ಮಾರಾಟ ಮಾಡುತ್ತಿದ್ದರು ಎಂದು ಸಿಸಿಬಿ ಪೊಲೀಸರು ಮಾಹಿತಿ ನೀಡಿದ್ಧಾರೆ. ಆರೋಪಿಗಳ ಪೈಕಿ ಮಹೇಂದ್ರ ಪರವಾನಿಗೆ ಪಡೆದು, ನಂದಿನಿ ಉತ್ಪನ್ನ ಅಧಿಕೃತ ಮಾರಾಟಗಾರನಾಗಿದ್ದಾನೆ. ಈತನ ಪುತ್ರ ದೀಪಕ್ ಇದೇ ವ್ಯವಹಾರ ಮಾಡಿಕೊಂಡಿದ್ದಾನೆ.
ಮುನಿರಾಜು ಮತ್ತು ಅಭಿಅರಸು ನಕಲಿ ತುಪ್ಪ ತಯಾರು ಮಾಡಿ ಬೆಂಗಳೂರಿಗೆ ಸರಬರಾಜು ಮಾಡುತ್ತಿದ್ದರು. ಇತ್ತೀಚೆಗೆ ಮಹೇಂದ್ರನ ವ್ಯವಹಾರದಲ್ಲಿ ಕೆಲ ವ್ಯತ್ಯಾಸ ಕಂಡು ಬಂದಿತ್ತು. ಹೀಗಾಗಿ ಕೆಎಂಎಫ್‌ನ ಜಾಗೃತ ದಳದ ಅಧಿಕಾರಿಗಳು ಆಂತರಿಕ ತನಿಖೆ ನಡೆಸಿದಾಗ 1 ವರ್ಷದಿಂದ ಅಕ್ರಮ ನಡೆಯುತ್ತಿರುವುದು ಬೆಳಕಿಗೆ ಬಂದಿದೆ ಎಂದು ಪೊಲೀಸರು ತಿಳಿಸಿದ್ಧಾರೆ.
ಅಕ್ರಮ ಹಿನ್ನೆಲೆ ಸಿಸಿಬಿ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಈ ಹಿನ್ನೆಲೆಯಲ್ಲಿ ನ.14ರಂದು ಮಹೇಂದ್ರ ಮಾಲೀಕತ್ವದ ಚಾಮರಾಜಪೇಟೆ ನಂಜಾಂಬ ಅಗ್ರಹಾರದಲ್ಲಿರುವ ಕೃಷ್ಣ ಎಂಟರ್ಪ್ರೈಸಸ್‌ ಎಂಬ ಗೋಡೌನ್ ಮತ್ತು ಅವರ ಸರಕು ಸಾಗಾಣಿಕೆ ವಾಹನಗಳ ಮೇಲೆ ಸಿಸಿಬಿ ಪೊಲೀಸರು ಮತ್ತು ಕೆಎಂಎಫ್‌ ಜಾಗೃತ ದಳ ಅಧಿಕಾರಿಗಳು ಜಂಟಿಯಾಗಿ ದಾಳಿ ನಡೆಸಿದ್ದರು.
ಈ ವೇಳೆ ತಮಿಳುನಾಡಿನಿಂದ ಕಲಬೆರಕೆ ತುಪ್ಪವನ್ನು ನಂದಿನಿ ಬ್ರ್ಯಾಂಡ್ ಸ್ಯಾಚೆಟ್‌ಗಳಿಗೆ ಮತ್ತು ಪ್ಲಾಸ್ಟಿಕ್ ಬಾಟಲಿಗಳಿಗೆ ತುಂಬಿ ಮಹೇಂದ್ರ ಗೋಡೌನ್‌ಗೆ ಸಾಗಾಟ ಮಾಡುತ್ತಿರುವುದು ಬೆಳಕಿಗೆ ಬಂದಿದೆ. ದಾಳಿ ವೇಳೆ 5 ಮೊಬೈಲ್‌ಗಳು, 4 ಬೊಲೇರೋ ಗೂಡ್ಸ್ ವಾಹನಗಳು, ಕೃತ್ಯದಿಂದ ಸಂಪಾದಿಸಿದ 1.19 ಕೋಟಿ ರೂ. ನಗದು, 56.95 ಲಕ್ಷ ರೂ. ಮೌಲ್ಯದ 8136 ಲೀಟರ್ ಕಲಬೆರೆಕೆ ತುಪ್ಪದ ಪ್ಯಾಕೆಟ್‌ಗಳು, ತೆಂಗು ಮತ್ತು ಪಾಮ್‌ ಆಯಿಲ್‌ ತುಂಬಿದ ಕ್ಯಾನ್‌ಗಳನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದರು.