ಮೂಡುಬಿದಿರೆ, ಸೆಪ್ಟೆಂಬರ್ ೨: ಹಾವೇರಿ ಜಿಲ್ಲೆಯ ಹಟ್ಟಿಮತ್ತೂರು ಗ್ರಾಮದ ರೈತ ಮಂಜುನಾಥ ಉಳ್ಳಾಗಡ್ಡಿ ಅವರ ಪುತ್ರಿ ಸೃಷ್ಟಿ ಅವರು ಜಾಗತಿಕ ಪಾವತಿ ತಂತ್ರಜ್ಞಾನ ಕಂಪೆನಿ ವೀಸಾದಲ್ಲಿ ಸಾಫ್ಟ್ವೇರ್ ಎಂಜಿನಿಯರ್ ಆಗಿ ಆಯ್ಕೆಯಾಗುವ ಮೂಲಕ ತಮ್ಮ ಛಲವನ್ನು ಸಾಬೀತುಪಡಿಸಿದ್ದಾರೆ. ಆಳ್ವಾಸ್ ಇನ್ಸ್ಟಿಟ್ಯೂಟ್ ಆಫ್ ಎಂಜಿನಿಯರಿಂಗ್ ಆ್ಯಂಡ್ ಟೆಕ್ನಾಲಜಿಯ ಮಾಹಿತಿ ವಿಜ್ಞಾನ ವಿಭಾಗದ ಅಂತಿಮ ವರ್ಷದ ವಿದ್ಯಾರ್ಥಿನಿಯಾಗಿರುವ ಸೃಷ್ಟಿ ಅವರಿಗೆ ವಾರ್ಷಿಕ ೪೬.೩೩ ಲಕ್ಷ ರೂ. ವೇತನ ಮತ್ತು ಇತರೆ ಸೌಲಭ್ಯಗಳ ಉದ್ಯೋಗ ಪ್ಯಾಕೇಜ್ ಲಭಿಸಿದೆ.
ಸೃಷ್ಟಿ ಅವರ ಈ ಸಾಧನೆಯ ಹಾದಿಯಲ್ಲಿ ಆಳ್ವಾಸ್ ಸಂಸ್ಥೆಯು ನೀಡಿದ ಇಂಟರ್ನ್ಶಿಪ್ ಅವಕಾಶವೇ ಮಹತ್ವದ ತಿರುವು. ಆರನೇ ಸೆಮಿಸ್ಟರ್ನಲ್ಲಿ ವೀಸಾ ಕಂಪೆನಿಯಲ್ಲಿ ೧೦ ವಾರಗಳ ಇಂಟರ್ನ್ಶಿಪ್ ಪಡೆದ ಅವರು, ೯೦,೦೦೦ ರೂ. ಸ್ಟೈಪೆಂಡ್ ಪಡೆದುಕೊಂಡು ತಮ್ಮ ತಾಂತ್ರಿಕ ಕೌಶಲ್ಯ ಮತ್ತು ಕಾರ್ಯದಕ್ಷತೆಯನ್ನು ಮೆರೆದರು. ಇಂಟರ್ನ್ಶಿಪ್ ಅವಧಿಯಲ್ಲಿನ ಅವರ ಅಸಾಧಾರಣ ಪ್ರದರ್ಶನವನ್ನು ಗಮನಿಸಿದ ವೀಸಾ ಸಂಸ್ಥೆಯು, ಅವರನ್ನು ನೇರವಾಗಿ ಪೂರ್ಣಾವಧಿ ಸಾಫ್ಟ್ವೇರ್ ಎಂಜಿನಿಯರ್ ಹುದ್ದೆಗೆ ಆಯ್ಕೆ ಮಾಡುವ ಮೂಲಕ ಅವರ ವೃತ್ತಿಜೀವನಕ್ಕೆ ಹೊಸ ದಾರಿ ತೆರೆಯಿತು.
ವೀಸಾ ಕಂಪೆನಿಯು ನೀಡಿರುವ ಈ ಉದ್ಯೋಗ ಕೊಡುಗೆಯಲ್ಲಿ ವೇತನದ ಜೊತೆಗೆ ಹಲವು ಆಕರ್ಷಕ ಸೌಲಭ್ಯಗಳು ಸೇರಿವೆ. ಅವುಗಳೆಂದರೆ, ಕುಟುಂಬಕ್ಕೆ ೭.೫೦ ಲಕ್ಷ ರೂ. ಮೌಲ್ಯದ ವೈದ್ಯಕೀಯ ವಿಮೆ, ೨೫,೦೦೦ ರೂ. ಹೊರರೋಗಿ ಚಿಕಿತ್ಸಾ ಸೌಲಭ್ಯ, ಮತ್ತು ೩ ಲಕ್ಷ ರೂ. ವರೆಗಿನ ಶಿಕ್ಷಣ ಸಹಾಯಧನ. ಇದರೊಂದಿಗೆ, ಜಿಮ್ ಸೌಲಭ್ಯ, ಕಚೇರಿ ಸಾರಿಗೆ ಮತ್ತು ವಾರ್ಷಿಕ ಆರೋಗ್ಯ ತಪಾಸಣೆಯಂತಹ ಹೆಚ್ಚುವರಿ ಸವಲತ್ತುಗಳೂ ದೊರೆಯಲಿವೆ.
ಗ್ರಾಮೀಣ ಹಿನ್ನೆಲೆಯ ರೈತ ಕುಟುಂಬದಿಂದ ಬಂದ ಸೃಷ್ಟಿ ಅವರ ಈ ಸಾಧನೆಯು ಅವರ ಪ್ರತಿಭೆ, ಪರಿಶ್ರಮ ಮತ್ತು ಅಚಲ ಛಲಕ್ಕೆ ಸಾಕ್ಷಿಯಾಗಿದೆ. ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷ ಡಾ. ಎಂ. ಮೋಹನ್ ಆಳ್ವ ಅವರು ಸೃಷ್ಟಿಯ ಸಾಧನೆಯನ್ನು ಶ್ಲಾಘಿಸಿ, ವಿದ್ಯಾರ್ಥಿಗಳಿಗೆ ಗುಣಮಟ್ಟದ ಶಿಕ್ಷಣದೊಂದಿಗೆ ಸೂಕ್ತವಾದ ಉದ್ಯಮ ಸಂಪರ್ಕ, ಇಂಟರ್ನ್ಶಿಪ್ ಮತ್ತು ಪ್ರಾಯೋಗಿಕ ಅನುಭವ ದೊರೆತಾಗ ಅಂತಹ ಪ್ರತಿಭೆಗಳು ಜಾಗತಿಕ ಮಟ್ಟದಲ್ಲಿ ಹೇಗೆ ಗುರುತಿಸಿಕೊಳ್ಳುತ್ತವೆ ಎಂಬುದಕ್ಕೆ ಸೃಷ್ಟಿಯೇ ಉತ್ತಮ ಉದಾಹರಣೆ ಎಂದು ಹೇಳಿದ್ದಾರೆ. ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಟ್ರಸ್ಟಿ ವಿವೇಕ ಆಳ್ವ, ಪ್ರಾಚಾರ್ಯರು ಮತ್ತು ಅಧ್ಯಾಪಕ ವೃಂದವೂ ವಿದ್ಯಾರ್ಥಿನಿಯ ಈ ಸಾಧನೆಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ವೀಸಾದಲ್ಲಿನ ಇಂಟರ್ನ್ಶಿಪ್ ತಮಗೆ ಅಮೂಲ್ಯವಾದ ಕೈಗಾರಿಕಾ ಅನುಭವ ನೀಡಿತು ಮತ್ತು ಅದೇ ತಮ್ಮ ಕನಸಿನ ಉದ್ಯೋಗವನ್ನು ಪಡೆಯಲು ನೆರವಾಯಿತು ಎಂದು ಸೃಷ್ಟಿ ಅಭಿಪ್ರಾಯಪಟ್ಟಿದ್ದಾರೆ. ಈ ಸಾಧನೆಯು ಆಳ್ವಾಸ್ ಸಂಸ್ಥೆಯ ವಿದ್ಯಾರ್ಥಿಗಳು ವಿವಿಧ ಕ್ಷೇತ್ರಗಳಲ್ಲಿ ತಮ್ಮ ಪ್ರತಿಭೆಯನ್ನು ಅನಾವರಣಗೊಳಿಸುತ್ತಿರುವ ಹೆಮ್ಮೆಯ ಕ್ಷಣವಾಗಿದೆ.