ಪ್ರತಿದಿನ ತುಮಕೂರಿನಿಂದ ಬೆಂಗಳೂರಿನ ಎಲೆಕ್ಟ್ರಾನಿಕ್ಸ್ ಸಿಟಿಗೆ ಪ್ರಯಾಣಿಸುವ ಐಟಿ ಉದ್ಯೋಗಿಗಳು ಮತ್ತು ಇತರ ಪ್ರಯಾಣಿಕರಿಗೆ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (ಬಿಎಂಟಿಸಿ) ಒಂದು ಸಿಹಿ ಸುದ್ದಿಯನ್ನು ನೀಡಿದೆ. ತುಮಕೂರಿನಿಂದ ಎಲೆಕ್ಟ್ರಾನಿಕ್ಸ್ ಸಿಟಿವರೆಗೆ ಎನ್ಐಸಿ ರಸ್ತೆ ಮೂಲಕ ಸಂಚರಿಸುವ ವಿಸ್ತಾರ ಎಸಿ ಬಸ್ ಸೇವೆಯನ್ನು ಇತ್ತೀಚೆಗೆ ಪ್ರಾರಂಭಿಸಲಾಗಿದೆ. ಇದು 101 ಕಿಲೋಮೀಟರ್ಗಳಷ್ಟು ದೂರದ ಪ್ರಯಾಣವನ್ನು ಒಳಗೊಂಡ ದೀರ್ಘ ಮಾರ್ಗದ ಬಸ್ ಸೇವೆಯಾಗಿದೆ.
ಹೊಸ ಸೇವೆಯಿಂದ ಪ್ರಯಾಣಿಕರಿಗೆ ಪ್ರಯೋಜನಗಳೇನು?: ಈ ಹೊಸ ನೇರ ಬಸ್ ಸೇವೆಯಿಂದಾಗಿ ಪ್ರಯಾಣಿಕರು ಮಾರ್ಗಮಧ್ಯದಲ್ಲಿ ಬಸ್ ಬದಲಾಯಿಸುವ ತೊಂದರೆಯಿಂದ ಸಂಪೂರ್ಣವಾಗಿ ಮುಕ್ತರಾಗಿದ್ದಾರೆ. ಇದರ ಫಲವಾಗಿ ಅವರ ಪ್ರಯಾಣದ ಸಮಯವು ಗಣನೀಯವಾಗಿ ಕಡಿಮೆಯಾಗಿದ್ದು, ಹೆಚ್ಚು ಅನುಕೂಲಕರ ವಾತಾವರಣ ಸೃಷ್ಟಿಯಾಗಿದೆ.
ಬಸ್ ಸಂಚಾರದ ವೇಳಾಪಟ್ಟಿ ಮತ್ತು ದರ: ಲಭ್ಯವಿರುವ ಮಾಹಿತಿಯ ಪ್ರಕಾರ, ಈ ವಿಸ್ತಾರ ಎಸಿ ಬಸ್ ಪ್ರತಿದಿನ ತುಮಕೂರಿನಿಂದ ಬೆಳಿಗ್ಗೆ 7.45 ಕ್ಕೆ ಪ್ರಯಾಣ ಆರಂಭಿಸಿ, ಬೆಳಿಗ್ಗೆ 9.45ರ ವೇಳೆಗೆ ಎಲೆಕ್ಟ್ರಾನಿಕ್ಸ್ ಸಿಟಿ ತಲುಪುತ್ತದೆ. ಮತ್ತೆ ಸಂಜೆ ೫.೪೫ ಕ್ಕೆ ಎಲೆಕ್ಟ್ರಾನಿಕ್ಸ್ ಸಿಟಿಯಿಂದ ಹೊರಡುವ ಈ ಬಸ್ ರಾತ್ರಿ ೯ ರ ವೇಳೆಗೆ ತುಮಕೂರನ್ನು ತಲುಪಲಿದೆ. ಈ ಮಾರ್ಗವು ನೆಲಮಂಗಲ, ಮಾದಾವರ ಮೂಲಕ ಸಾಗಿ ಎನ್ಐಸಿ ರಸ್ತೆಯನ್ನು ಸೇರುತ್ತದೆ. ಪ್ರಯಾಣಿಕರಿಗೆ ಪ್ರಯಾಣದ ದರವನ್ನು ₹200 ಎಂದು ನಿಗದಿಪಡಿಸಲಾಗಿದೆ.
ಒಂದೂವರೆ ಗಂಟೆಯ ವರೆಗೆ ಸಮಯ ಉಳಿತಾಯ: ಹೊಸ ನೇರ ಬಸ್ ಸೇವೆಯಿಂದ ಪ್ರತಿದಿನ ಪ್ರಯಾಣಿಸುವವರಿಗೆ ಸುಮಾರು ೪೫ ನಿಮಿಷದಿಂದ ಒಂದು ಗಂಟೆಯವರೆಗೆ ಸಮಯ ಉಳಿಯುತ್ತಿರುವುದಾಗಿ ಪ್ರಯಾಣಿಕರು ಸಂತಸ ವ್ಯಕ್ತಪಡಿಸಿದ್ದಾರೆ. ಇದಕ್ಕೂ ಮುನ್ನ, ತುಮಕೂರಿನಿಂದ ಎಲೆಕ್ಟ್ರಾನಿಕ್ಸ್ ಸಿಟಿಗೆ ತೆರಳಬೇಕಾದರೆ ಮೊದಲು ಕೆಎಸ್ಆರ್ಟಿಸಿ ಬಸ್ನಲ್ಲಿ ಅರಿಶಿನಕುಂಟೆಗೆ ಬಂದು, ನಂತರ ಬಸ್ ಬದಲಾಯಿಸಿ ಮಾದಾವರ ತಲುಪಿ, ಅಲ್ಲಿಂದ ಬಿಎಂಟಿಸಿ ಬಸ್ನಲ್ಲಿ ಎನ್ಐಸಿ ರಸ್ತೆ ಮೂಲಕ ಎಲೆಕ್ಟ್ರಾನಿಕ್ಸ್ ಸಿಟಿಗೆ ಪ್ರಯಾಣಿಸಬೇಕಾಗಿತ್ತು. ಈ ಬಹು-ಹಂತದ ಪ್ರಯಾಣವು ಹೆಚ್ಚು ಸಮಯ ತೆಗೆದುಕೊಳ್ಳುತ್ತಿತ್ತು. ಈಗ ಪ್ರಾರಂಭಿಸಿರುವ ನೇರ ಸೇವೆಯಿಂದ ಒಂದೇ ಬಸ್ನಲ್ಲಿ ಗಮ್ಯಸ್ಥಾನವನ್ನು ತಲುಪಬಹುದಾಗಿದೆ.
ಐಟಿ ಉದ್ಯೋಗಿಗಳಿಂದ ಶ್ಲಾಘನೆ: ಸಂಜೆ 5.45ಕ್ಕೆ ಎಲೆಕ್ಟ್ರಾನಿಕ್ಸ್ ಸಿಟಿಯಿಂದ ಹೊರಡುವ ಬಸ್ ಕಚೇರಿ ಸಮಯ ಮುಗಿಸಿ ಮನೆಗೆ ಮರಳುವ ಐಟಿ ಉದ್ಯೋಗಿಗಳಿಗೆ ಸೂಕ್ತವಾಗಿ ಹೊಂದಾಣಿಕೆಯಾಗಿದೆ ಎಂದು ಅವರು ಸಂತಸ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ, ಮಾದಾವರದಿಂದ ತುಮಕೂರಿನವರೆಗಿನ ಮಾರ್ಗದಲ್ಲಿ ಕಡಿಮೆ ನಿಲ್ದಾಣಗಳಿರುವುದರಿಂದ ಪ್ರಯಾಣವು ತ್ವರಿತವಾಗಿ ಮುಗಿಯುತ್ತದೆ ಎಂದು ಪ್ರಯಾಣಿಕರು ಅಭಿಪ್ರಾಯಪಟ್ಟಿದ್ದಾರೆ.
ಹೆಚ್ಚುವರಿ ಸೇವೆಗಳ ಬೇಡಿಕೆ: ಈ ಸೇವೆಗೆ ಪ್ರಯಾಣಿಕರಿಂದ ಅತ್ಯುತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿರುವ ಹಿನ್ನೆಲೆಯಲ್ಲಿ, ಎಲೆಕ್ಟ್ರಾನಿಕ್ಸ್ ಸಿಟಿಯನ್ನು ಬೆಂಗಳೂರಿನ ಇತರ ಉಪನಗರಗಳಿಗೆ ಸಂಪರ್ಕಿಸುವ ದೂರದ ಬಸ್ ಸೇವೆಗಳನ್ನು ಪ್ರಾರಂಭಿಸುವಂತೆ ಪ್ರಯಾಣಿಕರು ಬಿಎಂಟಿಸಿ ಸಂಸ್ಥೆಗೆ ಮನವಿಯನ್ನು ಸಲ್ಲಿಸಿದ್ದಾರೆ.
ಅತಿ ದೀರ್ಘ ಮಾರ್ಗದ ಸೇವೆ : ಒಟ್ಟಾರೆಯಾಗಿ, 101 ಕಿಲೋಮೀಟರ್ ಅಂತರವಿರುವ ಎಲೆಕ್ಟ್ರಾನಿಕ್ಸ್ ಸಿಟಿ ಮಾರ್ಗವು ಬಿಎಂಟಿಸಿ ಸಂಸ್ಥೆಯ ಅತಿ ಉದ್ದದ ಬಸ್ ಸೇವೆಯಾಗಿದ್ದು, ಪ್ರತಿದಿನ ಪ್ರಯಾಣಿಸುವ ಸಾವಿರಾರು ಮಂದಿಗೆ ಸಮಯ ಉಳಿತಾಯ ಮತ್ತು ಸುಗಮ ಪ್ರಯಾಣವನ್ನು ಒದಗಿಸಿದೆ. ಈ ಹೊಸ ಉಪಕ್ರಮವು ಬೆಂಗಳೂರು ಮತ್ತು ತುಮಕೂರು ನಡುವಿನ ಸಾರಿಗೆ ಸಂಪರ್ಕಕ್ಕೆ ಒಂದು ಪ್ರಮುಖ ಮೈಲಿಗಲ್ಲಾಗಿದೆ.