ಡೆಹ್ರಾಡೂನ್: ಉತ್ತರಾಖಂಡದ ಪೌರಿ, ರುದ್ರಪ್ರಯಾಗ ಮತ್ತು ಚಮೋಲಿ ಸೇರಿ ವಿವಿಧ ಜಿಲ್ಲೆಗಳಲ್ಲಿ ತೀವ್ರ ಕಂಪನದ ಅನುಭವವಾಗಿದೆ. ಕಂಪನಗಳು ಸಂಭವಿಸುತ್ತಿದ್ದಂತೆಯೇ ಜನರು ತಮ್ಮ ಮನೆಗಳಿಂದ ಹೊರಗೆ ಓಡಿ ಬಂದದ್ದಾರೆ.
ರಾಷ್ಟ್ರೀಯ ಭೂಕಂಪನ ವಿಜ್ಞಾನ ಕೇಂದ್ರದ (National Center for Seismology) ಪ್ರಕಾರ, ಭೂಕಂಪದ ಕೇಂದ್ರಬಿಂದು ಚಮೋಲಿ ಜಿಲ್ಲೆಯಲ್ಲಿದ್ದು, ಭೂಮಿಯ ಮೇಲ್ಮೈಯಿಂದ 13 ಕಿಲೋಮೀಟರ್ ಆಳದಲ್ಲಿ ಇದರ ಕೇಂದ್ರವಿತ್ತು. ರಿಕ್ಟರ್ ಮಾಪಕದಲ್ಲಿ ಈ ಭೂಕಂಪದ ತೀವ್ರತೆ 4.9 ರಷ್ಟಿತ್ತು ಎಂದು ತಿಳಿದು ಬಂದಿದೆ. ಇಲ್ಲಿಯವರೆಗೆ ಯಾವುದೇ ಪ್ರಾಣಹಾನಿ ಅಥವಾ ಆಸ್ತಿಪಾಸ್ತಿ ಹಾನಿ ವರದಿಯಾಗಿಲ್ಲ. ಭೂಮಿ ಕಂಪಿಸಿದ ತಕ್ಷಣ ಜನ ಭಯಭೀತರಾಗಿ ಕಿರುಚುತ್ತಾ ತಮ್ಮ ಮನೆಗಳಿಂದ ಹೊರಗೆ ಓಡಿ ಬಂದರು. ಶಿಮ್ಲಾ, ಕುರುಕ್ಷೇತ್ರ, ನೋಯ್ಡಾ, ಚಂಡೀಗಢ ಮತ್ತು ನವದೆಹಲಿಯಂತಹ ದೂರದ ಸ್ಥಳಗಳಲ್ಲೂ ಭೂಕಂಪನದ ಅನುಭವವಾಗಿದೆ.
ಹಿಮಾಲಯದ ಈ ರಾಜ್ಯವು ಭೂಕಂಪಗಳಿಗೆ ಹೆಚ್ಚು ಒಳಗಾಗುವಂತಹ ಪ್ರದೇಶವಾಗಿದೆ. ಇಲ್ಲಿ ಆಗಾಗ್ಗೆ ಭೂಕಂಪನದ ಅನುಭವವಾಗುತ್ತದೆ. ಭೂಕಂಪನ ವಲಯಗಳ ವರ್ಗೀಕರಣದ ಪ್ರಕಾರ, ಉತ್ತರಾಖಂಡವನ್ನು ‘ವಲಯ 6’ (Zone 6) ರಲ್ಲಿ ಸೇರಿಸಲಾಗಿದೆ. ಈ ಹಿಂದೆ, ಭೂಕಂಪನದ ಸಂವೇದನೆಯ ಆಧಾರದ ಮೇಲೆ ಉತ್ತರಾಖಂಡವನ್ನು ವಲಯ 4 ಮತ್ತು 5 ರ ಅಡಿಯಲ್ಲಿ ವರ್ಗೀಕರಿಸಲಾಗಿತ್ತು. ಆದರೆ, 2025 ರಲ್ಲಿ ಭಾರತೀಯ ಮಾನಕಗಳ ಬ್ಯೂರೋ (BIS) ದೇಶಾದ್ಯಂತ ಭೂಕಂಪನದ ಅಪಾಯದ ಮಟ್ಟವನ್ನು ಮೌಲ್ಯಮಾಪನ ಮಾಡುವ ಹೊಸ ನಕ್ಷೆಯನ್ನು ಬಿಡುಗಡೆ ಮಾಡಿತ್ತು; ಇದರ ಮೂಲಕ ಉತ್ತರಾಖಂಡವನ್ನು ವಲಯ 4 ಮತ್ತು 5 ರಿಂದ ‘ವಲಯ 6’ ಕ್ಕೆ ಮರು-ವರ್ಗೀಕರಿಸಲಾಗಿದೆ.